Атырдьах ыйын 22 күнүгэр модун Арассыыйа судаарыстыбаннай былааҕын күнэ бэлиэтэнэр. Ол чэрчитинэн, Атырдьах ыйын 21 күнүгэр П.А. Ойуунускай аатынан Литературнай түмэлгэ “Студия крафт” диэн бэрт ураты ааттаах-суоллаах сайыҥҥы оҕо сынньалаҥ лааҕырын алын сүһүөҕэр үөрэнэр оҕолоро күндү иитээччилэрин кытары Ойуунускай төрөөбүт балаҕанын куопуйатын, дьиэ кэргэнин кытары олорбут мемориальнай дьиэтин итиэннэ суруйааччылар баай ис хоһоонноох экспозицияларын, быыстапкаларын көрөн сөхтүлэр, махтайдылар. Барыта 8 тоҕуоруһа мустан кэлбит оҕолору түмэл үлэһиттэрэ Тимофей Гаврильев уонна Артем Осипов үөрэ-көтө көрүстүлэр. Кырачааннар түмэл аанын тэлэччи аһыахтарын иннинэ саха чулуу уола Былатыан Ойуунускай туһунан оҕоҕо уопсай, сүрүн өйдөбүл быһаарылынна. Оҕолор экскурсия кэмигэр Ойуунускай дьиэ кэргэнин кытары олорбут дьиэтин, туттубут малларын, үлэлээбит остуолун, араас кэмҥэ түспүт хаартыскаларын, бэл оҕотун хоһун, шкатулкатын олус интэриэһиргээн көрдүлэр. Холобура улуу киһи дьиэ кэргэнин, оҕолорун туһунан кэпсээни иһиттэхтэринэ кинилэр интэриэстэрэ өссө ордук улаатыахча дылы. Харса суох боппуруос биэрэллэр.
Оҕолорго саамай бэһиэлэй, көрдөөх чааһынан квест-оонньуу буолар. Аан бастаан оонньуу усулуобуйата сиһилии быһаарылынна. Манна кинилэр анал хамаандаҕа арахсыбакка эрэ бары бииргэ оонньоотулар. Кыттааччылар түмэл экспозицияларыгар сыһыарыллыбыт үс кэнбиэри булуохтаахтар. Ол кэннэ ону арыйан баран уус-уран айымньыттан быһа тардыыны ыытааччыга сиһилии, иэйиилээхтик ааҕан биэрэллэр. Кырачааннар түмэл экспозицияларынан сылдьан саха классик суруйааччыларын айымньыларыттан быһа тардан дьүүллүүр сүбэҕэ тиийэн иэйиилээхтик, дорҕоонноохтук аахтылар. Ол кэннэ тымтай, талкы хартыыналарын көрөн буллулар. Онон, 8 оҕоҕо оонньууга актыыбынайдык кыттыбыттарын туоһулуур дьупулуом туттарылынна уонна оҕо-аймах бары сөбүлээн эмэр чупа-чупса бэрилиннэ. Кыттааччылар уонна иитээччилэр түмэл саамай кэрэ көстүүтүгэр Былатыан Ойуунускай “Дьулуруйар Ньургун Боотур” диэн улуу олоҥхотун хартыынатын иннигэр уопсай хаартыскаҕа хатаннылар. Оҕолор бэл астынан-дуоһуйан, аралдьыйан бардылар.
Артем Осипов
