Бүгүн бэс ыйын 5 күнүгэр маннык ааттаах тэрээһин П.А. Ойуунускай аатынан Литературнай музейга буолла. Музей үлэһитэ Е.Ноговицына уонна университет доцена Аммосова А.Васильева А.С. Пушкин айымньыларын сахалыы саҥарпыт саха суруйааччыларын билиһиннэрдилэр. Онтон норуот суруйааччыта Н.Михалева – Сайа, врач идэлээх, көҥүл тылбаасчыт В. Комиссарова – Күлүмүрэ хас сыллаахтан Пушкин айымньыларын тылбаастыылларын сүрдээх сэргэхтик, киһи иһиттэр истэ олоруон курдук кэпсээтилэр, тылбаастарын аахтылар. Биир хоһоону икки киһи бэйэ бэйэлэрин билсибэккэ сылдьан тылбаастабыттара, дьэ, дьикти. Ити дьиктитэ Пушкин айымньыларыгар кистэммит быһыылаах. Тылбаасчыттар бэйэлэрэ этэллэринэн Пушкины тылбаастыыллара төрөөбүт тылларын билэллэригэр улахан көмөлөөх эбит. Кинилэри тылбаастарын истэ олорон чахчы оннук эбит диэн итэҕэйэҕин уонна хоһоон иэйиитин ылынаҕын. Оҕо дыбарыаһыгар баар «Поэзия абылана» диэн куруһуогу салайар Л. Романова Н.Михалева – Сайа тылбаастаабыт “Өйдүүбүн ол күлүм түгэни…” (“Я помню чудное мгновенье”) диэн хоһоонугар бэйэтэ мелодия айбыт уонна ону бүгүн аан бастаан толорон барыбытын соһутта. Сайа киниэхэ ис сүрэҕиттэн махтанна. Истээччилэр А. Гуринов -Арчылан «Пушкин уонна ойуун эттэтиитэ» диэн норуодунай поэт С. Руфов анаарыытын кэпсээбитин эмиэ кэрэхсээтилэр. Кэлбит ыалдьыттарбыт бары даҕаны Пушкины оҕо саастарыттан таптыыр, айымньыларын ааҕар буоланнар сэргэх, истиҥ тэрээһин буолла. Кинилэр Национальнай библиотека туруорбут быыстапкатын тула мустан 1937 сыллаахтан тахсыбыт А. Пушкин айымньыларын тылбаастарын кинигэлэрин, С. Адамова аҕалбыт значоктарын, открыткаларын көрдүлэр. Учуутал, учуонай К.Саввина, Таатта олохтооҕо А.Григорьева, куораттан М.Неймохова, В. Яковлева санааларын үллэһиннилэр, тылбаастарын аахтылар. Ыалдьыттарбыт махтаммыттарыгар биһиги утары махтанныбыт. Тэрээһин бүтүүтэ викторина уонна оҕолорго ыытыллыбыт уруһуй конкурсун түмүгүн билиһиннэрдилэр.
Биһиги музейбыт сыл аайы бэс ыйын 6 күнүгэр, ол аата А.Пушкин төрөөбүт күнүгэр, араас тэрээһиннэри ыытар. Быйыл өрөгөйдөөх үбүлүөйдээх сылыгар мустубут дьон барыта уу сахалыы кини хоһооннорун аахтылар. Дьэ, онон барыта бэйэтэ эппитинии буолан таҕыста:
Я памятник себе воздвиг нерукотворный,
К нему не зарастет народная тропа,
Вознесся выше он главою непокорной
Александрийского столпа.
Эбэтэр Н.Михалева – Сайа тылбаастаабытыныы:
Мэҥэ тыл күүһүнэн мэҥэ таас туруордум,
Бар дьонум сүрэҕэр өлбөппүн түстэнним,
Көҥүлбүн тургуппут мин моонньоох баспынан
Күн судаар мэҥэтин куоһара үрдээтим…
Е.Ноговицына, П.А. Ойуунускай музейын научнай үлэһитэ
