Саха национальнай гимназиятын “Айыы кыһата” оскуолатыгар бэс ыйын 3 күнүттэн саҕалаан оҕо сайыҥҥы лааҕыра үлэлиир. Ол курдук, от ыйын 8 күнүттэн 19 диэри лааҕыр үһүс сезона үлэтин күргүөмнээхтик ыытар. Манна 7-10 диэри саастаах оҕолор сынньаналлар. Лааҕыр оҕо толкуйдуур дьоҕурун, логикатын, сахалыы саҥатын сайыннарар хайысхалаах үлэлиир. Оннук санаанан сиэттэрэн от ыйын 12 күнүгэр П.А. Ойуунускай аатынан литэрэтиирэ түмэлин үлэһиттэрэ Артем Осипов уонна Тимофей Гаврильев “Айыы кыһата” оскуола лааҕырыгар 6-8 саастаах диэри оҕолорго саха классик суруйааччыларыгар аналлаах квиз-оонньууну ыыттыбыт. Манна барыта 11 оҕо кыттыыны ылла. Оҕолору лааҕыр иитээччитэ Кристина Дмитриевна Егорова кытыннартаата.
Оскуола олбуорун атыллаан киэҥ сырдык сахалыы эйгэлээх оскуола аанын иннигэр Кристина Дмитриевна биһигини кылааска диэри арыаллаата. Кылааска киирээппитин кытары оҕолор бары ох курдук оҥостон оонньууга бэлэм олороллор. Аан бастаан кэһиллибэт сахалыы үтүө үгэс быһыытынан оҕолору кытары эйэҕэстик эҕэрдэлэһэн баран кылгастык Ойуунускай түмэлин туһунан иһитиннэрии буолла. Иһитиннэрии кэмигэр оҕолору саха баай ис хоһоонноох литэрэтиирэ түмэлин кэлэн көрөллөрүгэр уонна ону ааһан квест-оонньууга кытталларыгар кыаҕы, интэриэһи үөскэттибит. Оонньуу чааһыгар кырачааннар чопчу биир тылтан элбэх тылы таһаарарга үөрэннилэр. Холобура, “куртуйахтар” диэн элбэх ахсааҥҥа турар аат тылтан аҕыйах сөкүүндэ иһигэр син балайда тылы таайдылар. Оттон саха классик суруйааччыларыгар аналлаах биктэриинэҕэ оҕолор Өксөкүлээх Өлөксөй өйдөбүнньүгүн көрөннөр тута биллилэр. Салгыы таайтарыылаах таабырыны оҕо-аймах эрэ барыта сөбүлээн үөрэ-көтө оонньуур оонньуута. Манна бары харса суох хоруйу биэрдилэр. Онон, уопсай түмүгү ылан көрдөххө субу курдук:
1 миэстэ – Охлопков Мичил;
2 миэстэ – Тимофеева Виолетта;
3 миэстэ – Неустроева Ева.
Артем Осипов
