Бэс ыйын 10 күнүгэр П.А. Ойуунускай аатынан Литературнай түмэлгэ Дьокуускай куорат 12 нүөмэрдээх орто оскуолатын иһинэн үлэлиир “Непоседы” диэн сайыҥҥы оҕо лааҕырын алын уонна орто сүһүөҕүн оҕолоро экскурсиялаан уонна оонньоон-көрүлээн бардылар. Оҕолору “Комета” этэрээтин иитээччитэ З.А. Чичахова аҕалан кытыннартаата. Оҕолор Ойуунускай төрөөбүт балаҕанын куоппуйатыгар, мемориальнай дьиэтигэр сылдьан экскурсиялаатылар. Экскурсияны уонна оонньууну түмэл үлэһитэ Артем Осипов иилээн-саҕалаан ыытта. Манна оҕолор үс хамаандаҕа арахсан оонньоотулар. Ол курдук, түмэл экспозицияларынан сылдьан саха классик суруйааччыларын айымньыларыттан быһа тардан аахтылар. Оттон “асфальга уруһуй” күрэҕэр оҕолор бэйэлэрин сөбүлүүр дьоруойдарын олус бэркэ биэрэн уруһуйдаатылар. Онон, үс хамаандаҕа үһүөннэригэр дьупулуом туттарылынна. Оттон кыайыылаах бастакы миэстэлээх хамаандаҕа уонна саамай үчүгэйдик уруһуйдаабыт оҕолорго минньигэс кэмпиэт бэрилиннэ. Ону таһынан “Комета” этэрээтин иитээччитигэр З.А. Чичаховаҕа оҕолору ситиһиилээхтик аҕалан кытыннарбытын туоһулуур “Махтал сурук” туттарылынна.
Артем Осипов
