Ыам ыйын 16 күнүгэр П.Ойуунускай аатынан Литературнай музейга «Суруйааччы аата – үйэлэргэ” диэн ааттаах тэрээһиҥҥэ cаха биллэр суруйааччыларын оҕолорун кытары көрсүһүү буолла. Бу көрсүһүүнү СӨ култуураҕа уонна духуобунай сайдыыга министиэристибэтэ, Саха сирин суруйааччыларын сойууһа уонна биһиги музейбыт сүбэлэһэн тэрийдилэр.
Көрсүһүүнү Саха сирин норуодунай бэйиэтэ, өр сылларга суруйааччылар сойуустарын салайбыт, мустубут дьон төрөппүттэрин уонна бэйэлэрин бэрткэ билэр Наталья Ивановна Харлампьева иилээн-саҕалаан ыытта.
Тыл этээччилэр ийэлэрин-аҕаларын уйадыйан аҕыннылар, кинилэр хаалларбыт нэһилиэстибэлэрин хайдах көрөн-истэн сылдьалларын, дьоннорун ааттарын үйэтитэргэ тугу оҥорбуттарын, онно ханнык мэһэйдэри көрсүбүттэрин кэпсээтилэр. Аны тулалыы олорор оҕо саастарыттан билсэр, хардарыта ыалдьыттаһар үөлээннээхтэрин көрсөн үөрдүлэр. Дьоллоох да этибит, — диэбиттэрин киһи чахчы ылынар. Кинилэр аҕалара — суруйааччылар олох араас мускуурдарын, ыарахаттарын көрсүбүт буолан эйэлээх да эбиттэр, бэйэ – бэйэлэрин өйдөһөн, өйөнсөн уустук да кэмнэри туораабыттар. 1970 сылтан барахсаттар биһиги музейбытыгар кэлэн субуотунньуктуулларын хаартыскаларга көрдөхпүтүнэ, ахтыыларын аахтахпытына бэйэбит даҕаны уйадыйабыт. Оҕолорун эмиэ сөпкө да ииппит эбиттэр. Ол да иһин кинилэр биһиги музейбыт бастыҥ көмөлөһөөччүлэрэ, субэһиттэрэ буолаллар. Холобура, Кулаковскайдар, Н.Д. Неустроев аймахтара, Суорун – Омоллоон, Даниловтар оҕолоро, сиэннэрэ, Күн Дьирибинэ кыыһа Мария Степановна, С.И. Тарасов, П.Д. Аввакумов дьиэ кэргэннэрэ. В.С. Яковлев – Далан, С.О. Никифоров кыргыттара аҕаларыгар, ийэлэригэр истиҥ сыһыаннарын эмиэ сөҕөбүт. Н.Е. Мординов – Амма Аччыгыйын сиэнэ Никита Семенович эһэтин мэтириэттэрин музейга көрөн наһаа үөрдэ, долгуйда. Ефросиния
Мин саныахпар, бу тэрээһин саамай долгутуулаах түгэнинэн А.Е. Кулаковскай ыччаттара, Н.Д. Неустроев уонна А.И. Софронов – Алампа чугас аймахтара билсибиттэрэ буолар. Кулаковскайдартан Рива Реасовна, Марианна Атосовна, Неустроевтартан Михаил Гаврильевич Гоголев кыыһынаан Алифтыын уонна бу халыҥ аймах төрүччүтүн оҥорооччу Вера Романовна Гоголева кэлбиттэрэ. Аны А.И. Софронов – Алампа аймаҕа И.А. Сивцева сиэнэ Диана дьоһуннаах баҕайытык тыл этэн үөртэ.
Маннык мустуулары тэрийэр уустук, сороҕор сылаалаах. Ол иһин ыҥырыылаах ыалдьыттарбыт истиҥник махтанан барбыттара – дьол. Иннибитигэр — саҥа былааннар, араас тэрээһиннэр, кинигэ, альбом тахсыытыгар хардарыта көмөлөсүһүү.
Ефросинья Ноговицына, музей научнай үлэһитэ
