Англия аатырбыт бөлөһүөгэ Фрэнсис Бэкон “Любовь к родине начинается с семьи” диэбиттээҕэ. Сахалар “Омук көмүскэлэ, эрэлэ –дьиэ кэргэн”, — дииллэр эбит. Былыр былыргыттан оҕоҕо ол иһин төрүттэрин туһунан кэпсииллэрэ, ийэ-аҕа уустарын чулуу дьоннорунан киэн тутталларыгар үөрэтэллэрэ, сэрэтии быһыытынан мөлтөх аймахтарын эмиэ ахтан ааһаллара. Оннооҕор өбүгэлэрин буулаабыт ыарыыларын, тоҕо уһун-кылгас олохтоммуттарын, эбиитин оҕо ханнык уруутун утумнаабытын кэтээн көрөн быһаараллара. Ол да иһин дьиэтигэр – уотугар сөптөөхтүк иитиллибит киһини “Ытык дьон ыччата, төрүт киһи төрүөҕэ”, — диэн киэн тутта ааттыыллара.
Билигин биһиги үгүспүт төрүттэрбит хаһан төрөөбүттэрин, өлбүттэрин, ыччаттарыттан хастара тыыннаах ордон олоҕу салҕаабыттарын туһунан архыып докумуоннарыттан эрэ билэр кыахтаахпыт. Оттон архыыпка үлэлииргэ, чинчийиилэргит үтүө түмүктэрдээх буолалларыгар сүбэ – ама хайаан да наада.
Дьэ, ол иһин ыам ыйын 14 күнүгэр күнүс 15.00 чааска П.А. Ойуунускай аатынан Литературнай музейга Национальнай архыып информационнай өҥөлөрүн салаатын сүрүн үлэһитин Баишева Наталья Егоровнаны кытары ирэ – хоро кэпсэтии буолан ааста. Чинчийиинэн урут дьарыктамматах дьон архыыпка эһээлэрэ, аҕалара докумуоннара баарын билэн үөрүүлэрэ үксээтэ, сүргэлэрэ көтөҕүлүннэ.
Түгэнинэн туһанан Национальнай архыып салайааччыларыгар, үлэһиттэригэр барҕа махталбытын тиэрдэбит, кинилэр көрөн — харайан харыстаан бу докумуоннар биһиэхэ тиийэн кэллэхтэрэ. Аҥардас төрүччүлэрин үөрэтэр дьон архыып суолтатын сөптөөхтүк сыаналыыр, архыыппыт барахсан кэҥии – сайда турарыгар ис сүрэхтэриттэн баҕарар буоллулар диэтэххэ омун буолбатах. Аны сурук – бичик, үөрэх – билии Саха сиригэр баар буолан былыргы өбүгэлэрбит олохторун – дьарыктарын билэр кыахтаммыппытын эмиэ архыып баар буолан чуолкайдык өйдүүбүт.
Ыам ыйын 18 күнүгэр диэри төрүччүнү үөрэтээччилэр атын музейдарга мустуохтара, архыып үлэһиттэрэ кинилэргэ сыаналаах сүбэ – ама биэриэхтэрэ.
Ефросиния Ноговицына, музей научнай үлэһитэ
