Бэс ыйын 10 күнүгэр П.А. Ойуунускай аатынан Литературнай түмэлгэ Дьокуускай куорат “Айыы кыһата” национальнай гимназиятын иһинэн үлэлиир “Айыы алаһата” диэн оҕо күнүскү лааҕырын алын уонна орто сүһүөҕүн оҕолоро экскурсиялаан уонна оонньоон-көрүлээн бардылар. Оҕолору “Тииҥ мэйии”, “Чэбдик” этэрээтин иитээччилэрэ аҕалан кытыннартаатылар. Оҕолор Ойуунускай төрөөбүт балаҕанын куоппуйатыгар, мемориальнай дьиэтигэр сылдьан экскурсиялаатылар. Экскурсияны уонна оонньууну түмэл үлэһиттэрэ Яна Поскачина уонна Артем Осипов иилээн-саҕалаан ыыттылар. Манна оҕолор үс хамаандаҕа арахсан оонньоотулар. Ол курдук, түмэл экспозицияларынан сылдьан саха классик суруйааччыларын айымньыларыттан быһа тардан аахтылар. Онон, үс хамаандаҕа үһүөннэригэр дьупулуом туттарылынна. Оттон кыайыылаах бастакы миэстэлээх хамаандаҕа минньигэс кэмпиэт бэрилиннэ. Ону таһынан лааҕыр этэрээтин иитээччилэригэр оҕолору ситиһиилээхтик аҕалан кытыннарбытын туоһулуур “Махтал сурук” туттарылынна.
Артем Осипов
