Бэс ыйын 7 күнүгэр П.А. Ойуунускай аатынан Литературнай түмэлгэ Дьокуускай куорат 17 нүөмэрдээх орто оскуолатын иһинэн үлэлиир “Бизончик” диэн сайыҥҥы оҕо лааҕырын алын сүһүөҕүн оҕолоро экскурсиялаан уонна оонньоон-көрүлээн бардылар. Оҕолору “Родничок” этэрээтин иитээччитэ А.А. Левина аҕалан кытыннартаата. Оҕолор Ойуунускай төрөөбүт балаҕанын куоппуйатыгар, мемориальнай дьиэтигэр сылдьан экскурсиялаатылар. Экскурсияны уонна оонньууну түмэл экскурсовода Тимофей Гаврильев уонна Артем Осипов иилээн-саҕалаан ыыттылар. Манна оҕолор үс хамаандаҕа арахсан оонньоотулар. Ол курдук, түмэл экспозицияларынан сылдьан саха классик суруйааччыларын айымньыларыттан быһа тардан аахтылар. Оттон “асфальга уруһуй” күрэҕэр оҕолор бэйэлэрин сөбүлүүр дьоруойдарын олус бэркэ биэрэн уруһуйдаатылар. “Көрдөөх стартар” диэн саамай бэһиэлэй түһүмэххэ оҕолор сүүрэ-көтө, куоталаһа оонньоотулар. Онон, үс хамаандаҕа үһүөннэригэр дьупулуом туттарылынна. Оттон кыайыылаах бастакы миэстэлээх хамаандаҕа уонна саамай үчүгэйдик уруһуйдаабыт оҕолорго минньигэс кэмпиэт бэрилиннэ. Ону таһынан “Родничок” этэрээтин иитээччитигэр А.А. Левинаҕа оҕолору ситиһиилээхтик аҕалан кытыннарбытын туоһулуур “Махтал сурук” туттарылынна.
Артем Осипов
