Ырыа – хоһоон, тойук бөҕөтүн иһиттибит, үҥкүү, быыстапка арааһын көрдүбүт, дьон – сэргэ дьоҕурун сөхтүбүт, өссө һээдьэлээтибит, оһуохайдаатыбыт.
Музейдар нэдиэлэлэрэ П.А. Ойуунускай аатынан музейга умнуллубаттык түмүктэннэ. Бастакынан доҕоттторбут – “АйАрт” холбоһук кыттыылаахтара – “Уһуктуу” диэн туспа былааннаах тэрээһиннэрин көрдөрдүлэр. Алгыстан саҕаламмыт, үҥкүүлэринэн киэргэтиллибит (“Айдара” ансаамбыл, салайааччылар С.Р. Захарова, М.Н. Скрябина, В.М. Шадрина), ырыаларынан доҕуһуолламмыт (“Ньургуһун” концерт) бу тэрээһиннэр кэлбит дьону барытын кэрэхситтилэр. Аны олоҥхоһуттаахтар. Төрүччүнү үөрэтиэн баҕалаах дьоҥҥо мастер – кылааһы ыытарга национальнай архыып үлэһитин Е.А. Сергиенканы ыҥырыбыттар, онно элбэх да элбэх киһи сырытта. Холбоһук тэрийбит быыстапкалара эмиэ дьиктилэр. Ол курдук мастан оҥоһуктар, оҕону сайыннарарга анаммыт араас оонньуулар, хлопоктан өрүллүбүт саптан сэлээппэлэр, киэргэллэр дьон болҕомтотун тартылар.
Эбиэт кэнниттэн «МИМУОЗА» уран дьүһүлгэн салона бэйэтин тэрээһиннэрин ыытта (салайааччы М.Иванова – Дайар Суһум). Салон кыттыылаахтара эмиэ музейбыт доҕотторо. Бастаан иккис этээскэ тахсан норуот суруйааччыта Н.В. Михалева-Сайаны кытары көрүстүбүт, кини “музей” диэн тэрилтэҕэ аан бастаан сылдьыбытын туһунан кэпсээнин иһиттибит. Аны кини ааҕарга анаан бэлэмнэнэн “Ойуунускайга сүгүрүйүү” диэн олох эдэр сылдьан суруйбут хоһоонун илдьэ кэлбит. Ити хоһоону биһиги музейбытыгар сылдьан баран айбыт эбит. Салон иккис көрсүһүүтэ “Историяны, олорбут олохпутун кэрэһилиир айымньылар” диэн ааттаах. Кыттааччылар Василий Гоголев-Уйулҕан, Яков Алексеев, тыл билимин кандидата Саргылаана Ноева. Бары даҕаны кэрэ кэпсээннээх дьон. Киһи истэ олоруох курдук. Онтон быйыл күһүн телевиденияҕа кэрэхсээн көрбүт «Хоһоон суһума» диэн телевизионнай барыл кыттыылаахтарын кытары көрсүстүбүт. Кинилэр барылга ким ыҥырбытын хайдах бэлэмнэммиттэрин, бэйэ – бэйэлэрин кытары доҕордуу буолбуттарын аҕыннылар. Хоһоон айааччылар “кынаттарынан” ити барылга буолбуттара биллэр артыыстар. Кинилэртэн норуодунай артыыс А.Г. Емельянов соло булан кэлэн, кыттан 86ртэ. Бүтэһигэр Дьааҥы олоҥхотун, ырыаларын уратыларын. Дьааҥы улууһун кииннэммит библиотекатын кыраайы үөрэтэр салаатын үлэһитэ, ырыаһыт, олоҥхоһут Саргылаана Слепцова-Хатан Кылаан билиһиннэрдэ. Кини дьоҕурун сөҕөн “Буолар да эбит”, — эрэ дииргэ тиийэбит. Бүтэһигэр һээдьэ, оһуохай буолла.
Дьэ, ити курдук доҕотторбут, биһигини, музей үлэһиттэрин, Аан дойдутааҕы музейдар күннэринэн дьиктитик, умнуллубаттык эҕэрдэлээтилэр. Махтал буоллун кинилэргэ.
Е.С. Ноговицына, музей научнай үлэһитэ
