Муус устар 12 күнүгэр П.А. Ойуунускай аатынан Литературнай түмэлгэ саха тылынан уус-уран литэрэтиирэтин төрүттээччи А.Е. Кулаковскай – Өксөкүлээх Өлөксөй суос соҕотох уола, хомоҕой хоһоонньут, сээркээн сэһэнньит Реас Алексеевич Кулаковскай төрөөбүтэ 110 сылыгар аналлаах истиҥ-иһирэх көрсүһүү буолан ааста. Манна суруйааччы кинигэлэрин уонна хаартыскаларын быыстапката көрөөччү дьүүлүгэр турда.
Көрсүһүүнү түмэл үлэһитэ Ньургуйаана Викторовна Халгаева иилээн-саҕалаан ыытта. Кини суруйааччы төрөппүт аҕатын Өксөкүлээх Өлөксөй туһунан бэйэтин көрүүлэригэр, аймахтарын ахтыыларыгар уонна араас чахчыларга, докумуоннарга олоҕуран суруйбут “Аҕам олоҕо” диэн ахтыы-сэһэнин кылгастык быһа тардан кэпсээтэ. Тэрээһин буолуон аҕай иннигэр ыраахтан сылдьар күндү ыалдьыкка Лариса Реасовнаҕа сибэкки дьөрбөтө уонна махтал суруга туттарылынна. Манна бэрт сэргэх кэпсэтиигэ эһэтин, аҕатын, дьиэ кэргэнин, аймахтарын тустарынан ыраахтан сылдьар күндү ыалдьыт, Реас Кулаковскай кыыһа Лариса Реасовна Кулаковская ирэ-хоро сиһилии кэпсээтэ. Истиҥ кэпсэтиһиигэ түмэл дириэктэрин солбуйааччыта Линда Николаевна Иванова, түмэл научнай үлэһитэ Ефросинья Семеновна Ноговицына, “Айар” кинигэ кыһатын генеральнай дириэктэрин солбуйааччыта Валерий Николаевич Луковцев, ыраахтан-чугастан кэлбит күндү ыалдьыттар кыттыыны ыллылар. Истиҥ-иһирэх көрсүһүү хомус дьүрүскэн тыаһынан киэргэтилиннэ. Литературнай түмэл эдэр үлэһиттэрэ Тимофей Гаврильев уонна Артем Осипов суруйааччы кэпсээннэрин аахпыттарын биллэрэн бэйэлэрин тус санааларын көрөөччүлэр иннилэригэр үллэһиннилэр.
Фото с мероприятия Виталия Слепцова
