Кулун тутар 29 күнүгэр күнүс 15.00 чааска П.А. Ойуунускай аатынан литературнай түмэлгэ саха классик суруйааччыларыгар аналлаах квиз-квест оонньуу бэрт сэргэхтик буолан ааста. Оонньууну түмэл экскурсовода Тимофей Гаврильев уонна Артем Осипов барыта 5 түһүмэхтээн иилээн-саҕалаан ыыттылар. Оонньууга Дьокуускай куорат бастакы нүөмэрдээх оскуолатыттан 5,6 уонна М.К. Аммосов аатынан ХИФУ норуоттар тылларын уонна култуураларын үнүстүүтүн устудьуоннара кыттыыны ыллылар. Манна хас биирдии кыттааччы икки хамаандаҕа арахсан оонньоотулар. Ол курдук, “Үрдэл” хамаандаҕа Максим Николаев, Алексеева Екатерина, Юлиана Сыромятникова, Настя Малышева. Оттон “Үрүмэччи” хамаандаҕа Настя Шайнурова, Софья Ю, Владимир Яковлев хас биирдии түһүмэххэ кимиэллээхтик кииристилэр. Тэрээһин түмүгэр дьүүллүүр сүбэ хас биирдии кыттыбыт оҕоҕо туоһу суругу туттарда уонна минньигэс аһынан күндүлээтэ. Оонньуу саамай долгутуулаах түгэнинэн түмүгү истии буолар. Ол курдук, куорат бастакы нүөмэрдээх оскуолатын учуутала Анна Даниловна Попова үөрэнээччилэрэ Юлиана Сыромятникова, Настя Малышева уонна Настя Шайнурова бастакы миэстэни ылан кыайыы өрөгөйүн биллилэр. Иккис миэстэҕэ устудьуоннар таҕыстылар.
