Аҕа дойду улуу сэриитин кыттыылааҕа, Албан аат уордьан үһүс степеннээх кавалера, “Берлини ылыы иһин”, “1941-1945 сс. Аҕа дойду сэриитигэр Германияны кыайыы иһин” о.д.а. мэтээллэрдээх, прозаик суруйааччы, Эрилик Эристиин аатынан литературнай бириэмийэ лауреата Семен Осипович Никифоров төрөөбутэ 100 сылыгар аналлаах киэһэ ахсынньы 7 кунугэр П.А.Ойуунускай аатынан литературнай музейга буолан ааста.
Суруйааччы кэргэнэ Варвара Павловна Никифорова 1972-1989 сылларга кинигэ издательствотыгар бухгалтер-кассирынан, онтон “Хотугу сулуска” кассир-курьерынан 75 сааһыгар дылы үлэлээбитэ. Кини 1983 сыллаахха литературнай музей фондатыгар аҕалан туттарбыт малларыттан суруйааччы ааҕыллан-ааҕыллан имиллибит тастаах кинигэлэрин, хаартыскаларын, уордьанын, мэтээллэрин, куруук кэппит ачыкытын, комсомольскай билетин, о.д.а. туттубут сорох малларын көрдөрүүгэ таһаардыбыт. Семен Никифоров билигин икки кыыһыттан Лидия Семеновна манна куоракка, Марфа Семеновна Мэҥэ Хаҥаласка олороллор, эһэлэрин сырдык аатын ааттатар элбэх сиэннэрдээхтэр, хос сиэннэр эмиэ бааллар. Бу тэрээһиҥҥэ суруйааччы улахан кыыһа, эмчит идэлээх Лидия Семеновна сүүрдэ-көттө, көмөлөстө. Кини оҕолорунаан, сиэнинээн кэлэннэр эһэлэрин, хос эһэлэрин туһунан истэн, ахтан-санаан аастылар. Быыстапкаҕа көрдөрүүгэ сытар мэтээллэр, хаартыскалар киниэхэ оҕо сааһын санаттылар.
Музей директора, норуодунай суруйааччы Н.А.Лугинов Семен Никифоров сүбэтинэн Суруйааччы сойууһугар киирбитин, эдэр дьоҥҥо көмөтүн, сүбэтин, бу күһүн суруйааччы дойдутугар Мэҥэ Хаҥалас Тыыллыматыгар аналлаах тэрээһиннэргэ, бюст туруоруутугар тахса сылдьыбытын аҕынна, суруйааччы оҕолоругар, дьонугар-сэргэтигэр үтүө тыллары эттэ. Ол кэнниттэн музей научнай үлэһитэ Ефросиния Семеновна экраҥҥа тыктаран көрдөрөн, Семен Осипович саҥа төрөөбүт аҕыйах хонуктаах улахан кыыһын Лидия Семеновнаны көтөҕөн, ыраах Кэбээйигэ өрүһүнэн, катерынан, оҥочонон, атынан айан суолун кытаанаҕын айаннаабыттарыттан картаҕа көрдөрөн, Кэбээйигэ үлэлээбит кэрдиис кэмин сэгэттэ, суруйааччы олоҕун, алтыспыт үтүө дьоннорун, суруйааччылары Софрон Даниловы, Н.Е.Винокуров-Урсуну, В.Гольдеровы, А.В.Кривошапкины о.д.а. “Сэмэн Никифоров туһунан” диэн 2003 сыллаахха А.И.Аржаков хомуйан оҥорбут ахтыы кинигэтигэр олоҕуран кэпсээтэ. Аны суруйааччы “Саллаат дьылҕата” диэн сэһэнигэр сэриигэ бииргэ сылдьыбыт дьонун туһунан суруйбутунан сирдэтэн сорохторун булбут. Онон Семен Осипович Берлиҥҥэ хаартыскаҕа бииргэ түспүт дьонун ааттара чуолкайданыах курдук буоллулар.
Буойун суруйааччы, суруналыыс, патриот, үтүөкэн киһи Семен Осипович Никифоров төһө да 57 эрэ сааһыгар дылы олордор кини аата ахтыллар, кини олоҕун холобура үрдүктүк сыаналанар. Прозаик суруйааччы алдьархайдаах уот сэрии туһунан, хорсун-хоодуот, патриот дьон олоҕун туһунан айымньылара өссө да ааҕылла туруохтара. Кини туһунан өссө даҕаны кэпсэтии салҕанан барыа.
Ньургуяна Халгаева, музей үлэһитэ
