You are currently viewing “Мэхээлэчээн булчут кэпсээннэрэ”

“Мэхээлэчээн булчут кэпсээннэрэ”

Бүгүн ыам ыйын 19 күнүгэр П.А. Ойуунускай аатынан литература музейыгар иккис этээскэ Оҕону ааҕыыга иитэр оонньуур хоско Тимофей Сметанин уонна Яков Стручков “Мэхээлэчээн булчут кэпсээннэрэ” оҕолорго аналлаах кэпсээннэринэн виртуальнай оонньуу (VR оонньуу) сүрэхтэниитэ буолла. Бу оонньууну Егоров Вячеслав Счаславович салайааччылаах ИТ-ГЕНЕРАТОР хааччахтаммыт уопсастыбаннай тэрилтэ үлэһиттэрэ санааларын ууран туран оҥордулар.


Ыҥырыылаах ыалдьыттарбытынан Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Местников Сергей Васильевич уонна Саха Өрөспүүбүлүкэтин култуураҕа уонна духуобунай сайдыыга миниистирэ Куприянов Юрий Степанович буоллулар.
Бу үөрүүлээх түгэҥҥэ суруйааччы Тимофей Сметанин кыыһа, РСФСР орто анал үөрэхтээһин үтүөлээх маастара, ССРС орто анал үөрэхтээһин туйгуна, үлэ бэтэрээнэ Сметанина Татьяна Тимофеевна сиэннэрин Люба, Быйаман, Эрхаан, ону тэҥэ Яков Стручков сиэннэрэ Слепцова Александра Петровна, Шоболова Милана Петровна кэлэннэр эһэлэрэ, хос эһэлэрэ суруйан, айан хаалларбыт Мэхээлэчээн булчут мүччүргэннээх сырыыларын туһунан кэпсээни истэн, саҥа сүрэхтэммит оонньууну астына көрдүлэр уонна бастакынан оонньууну хос сиэнигэр детсад иитиллээччитигэр Больницкай Быйамҥа уонна Больницкая Любаҕа бэрилиннэ. Оонньоон бүппүттэрин кэннэ оонньуу туһунан кылгастык бэйэтин санаатын Люба: “Мин хос эһэм аата Тимофей Сметанин, кининэн киэн туттабын, кини айымньыларын оҕолор, ааҕыҥ”, — диэн эппитин бары үөрэ иһиттибит.
Бу оонньуу иннинэ П.А. Ойуунускай аатынан академическай театр артыыһа, Саха Өрөспүүбүлүкэтин үтүөлээх артыыһа Кирилл Семенов «Мэхээлэчээн булчут кэпсээннэрэ” кэпсээниттэн “Куһу ураҕаһынан да бултуурбут” диэн кэпсээнин сахалыы таҥастаах талах олоппоско олорон оҕолорго анаан быһа тардан кэпсээтэ.
Саха норуодунай суруйааччыта, Литература музейын дириэктэрэ Н.А. Лугинов этэринэн, Кэбээйиттэн төрүттээх, саха буойун суруйааччыта Тимофей Сметанин айымньытын аныгы үйэ ирдэбилинэн оҕолорго тириэрдии биир көрүҥэ буолар. Ону бастакынан А.Г. уонна Н.К. Чиряевтар ааттарынан Дьокуускай куораттааҕы национальнай гимназия 3 б уонна 5 кылаастарын үөрэнээччилэрэ, учууталлара Мария Егоровна Габышева, Галина Семеновна Анисимова буоллулар. Онон бу оҕолор суруйааччылар Тимофей Сметанин уонна Яков Стручков айымньыларын кинигэтин көрөн-истэн, бастакынан оонньоон тарҕастылар.
Салгыы оҕо үөрэ-көтө элбэхтик экскурсиялыы, ааҕыыга уһуйулла кэлэригэр сайдыы хайысхатын тутуһабыт, үгүс былааммыт олоххо киирэриттэн үлэлииргэ күүс-көмө, бигэ тирэх биэрэр.
Бу оонньуубут салгыы сайдыан, саҥаттан саҥа виртуальнай оонньуулары оҥоруохпутун баҕарабыт. Баҕа санаабыт туоларыгар өрөспүүбүлүкэбит Ил Дархана уонна Бырабыыталыстыбата үгүс үтүө көмөнү оҥороллоругар ис сүрэхпититтэн махтанабыт уонна эрэнэбит.-


СӨ култуураҕа уонна духуобунай сайдыыга миниистирин Махтал суругунан музей специалиһа Петров Степан Владимирович уонна разработчик Егоров Вячеслав Счаславович, ону тэҥэ Ил Түмэн судаарыстыбаннай мунньаҕын депутата Христофорова Мария Николаевна махтал суругунан научнай-просветительскай салаа методиһа Каженкина Саргылана Андреевна уонна смотритель Иванов Максим Григорьевич наҕараадаланнылар.

Хаартыска түһэриитэ:

Виталий Слепцов .

Loading