Муус устар 21 кунугэр П.А. Ойуунускай аатынан Литература музейыгар саха биллиилээх поэта, ССРС Суруйааччыларын сойууһун чилиэнэ Гавриил Григорьевич Вешников-Баал Хабырыыс төрөөбүтэ 105 сылыгар аналлаах “Туох диирий сүрэҕим” уус-уран хоһоон ааҕыытын иккис күрэҕэ буолан ааста.
Күрэх сыалынан Г.Г. Вешников-Баал Хабырыыс хоһооннорун тылын-өһүн, ис хоһоонун нөҥүө ийэ тылга кэрэхсэбили үөскэтии, дойдунан киэн туттарга, ытыктыырга үөрэтии буолар.
Иккис күрэххэ оҕолор ийэлэрин, сиэннэр эбээлэрин кытары кэлэн, хоһоон ааҕан, ырыа ыллаан сэргэхситтилэр. Бары даҕаны бэрткэ бэлэмнэммиттэр. Ол эрээри, күрэх аата күрэх, ким эрэ кыайыахтаах, ким эрэ ситэ үөрэппэтэҕин билиниэхтээх.
Дьүүллүүр сүбэ биир санаанан бастакы миэстэни Скрябин Айсаҥҥа уонна кини иэйтигэр Христина Петровнаҕа биэрдэ. 31 – с нүөмэрдээх оскуола бастакы кылааһын үөрэнээччитэ Айсан хамсанан-имсэнэн “Сымыйаччы” уолу бу турарын курдук сэмэлээтэ. Ийэтин кытары биир да тылы умнубакка, сыыһа-халты туттубакка хоһооннорун чаҕылхайдык аахтылар. Иккис миэстэҕэ Амелия Ноговицына ийэтинээн Виола Романовналыын ыллылар. Таҥастара-саптара тупсаҕайа, хамсаналлара имигэһэ сөхтөрдө. “Таарый-таарый хомускун” диэн хоһоон кинилэр толорууларыгар тиллэн кэллэ. Үһүс миэстэҕэ Радомир Макаров эбээтинээн Клара Даниловналыын таҕыстылар. Бүгүҥҥү кыттааччылартан Радомир саамай улаханнара. Кини 2-с нүөмэрдээх национальнай политехническай орто оскуола 7-с кылааһыгар үөрэнэр. “Сиэним аан бастаан ылласта, буолаары буолан “Күн бытархайын”, — диэн эбээтэ олус үөрдэ. «Дорҕоонноохтук ааҕыы» номинация кыайыылаатарынан Корякина Аделина уонна эбээтэ Жоржетта Ивановна буоллулар. Ньургуһун буолан симэнэн кэлэн “Ньургуһуннары” аахтылар. “Чуор куолас” номинация Кюндяйцев Дьулустааҥҥа тигистэ. Барыга барытыгар хойутааччыны Баал Хабырыыс хоһуйбутун кини толоруутугар иһиттибит.
Бары кыттааччыларга Баал Хабырыыс ыччаттара бэлэмнээбит анал бириистэрин – “Аччыгый атастарбар” диэн кинигэни — туттардылар уонна музей үлэһитэ Е.В. Дохунаев бэйэтэ оҥорбут харысхалын кинилэргэ бэлэхтээтэ.
