Муус устар 20 кунугэр П.А. Ойуунускай аатынан литература музейыгар саха биллиилээх поэта, ССРС Суруйааччыларын сойууһун чилиэнэ Гавриил Григорьевич Вешников-Баал Хабырыыс төрөөбүтэ 105 сылыгар аналлаах “Туох диирий сүрэҕим” уус-уран хоһоон ааҕыытын күрэҕэ буолан ааста.
Күрэх сыалынан Г.Г. Вешников-Баал Хабырыыс хоһооннорун тылын-өһүн, ис хоһоонун нөҥүө ийэ тылга кэрэхсэбили үөскэтии, дойдунан киэн туттарга, ытыктыырга үөрэтии буолар.
Күрэх оскуолаҕа киириэн иннинээҕи саастаах оҕолорго анаан ыытылынна. Кыттааччылар – Дьокуускай куорат уhуйааннарын иитиллээччилэрэ.
Дьүүллүүр сүбэ кыттааччылары тыллара-өстөрө чуолкайын, уустаан-ураннаан, ис хоhоонун арыйан ааҕалларын, сыанаҕа сатаан тутталларын-хапталларын, сценическэй көстүүмнэрин сыаналаатылар.
Күрэх түмүгүнэн кыайыылааҕынан Баал Хабырыыс «Сылгы чыычааҕа» хоhоонун чуордук, дорҕоонноохтук ааҕан «Лучик» уhуйаан иитиллээччитэ 6 саастаах Устинова София буолла. Иккис миэстэни эмиэ «Лучик» уhуйаан иитиллээччитэ 6 саастаах Румянцева Айыллаана «Тииҥ мэйии» хоhоонун уус-ураннык ааҕан ылла. Үhүс миэстэҕэ «Золотой ключик» уhуйаан иитиллээччитэ Жарчинская Ксюша тигистэ. Ксюша «Кулунчук» хоhоону уу сахалыы ааҕан дьүүллүүр сүбэни, музей үлэhиттэрин соhутта. Ону таhынан, анал аат «Чуор куолас» — «Кэскил» уhуйаан иитиллээччитэ Неустроева Кэрэли («Мыынньык» хоhоон), «Ис хоhоонноохтук ааҕыы» – «Золотой ключик» уhуйаан иитиллээччитэ Корнилова Варя («Туhа киhитэ» хоhоон), «Дорҕоонноохтук ааҕыы» — «Кэскил» уhуйаан иитиллээччитэ Иванов Максим («Үчүгэй оҕо» хоhоон) буоллулар. Кыайыылаахтарга диплом уонна оҕолорго аналлаах кинигэ туттарылынна.
