Ороһу Уола Баһылай Куолдьарап 90 сылын бэлиэтээһин Дьокуускай куоракка үрдүк таһымҥа ыытылынна.
Саха омукка «Үтүө киһи аата үс үйэ тухары барар» диэн сүрдээх дириӊ ис хоһоонноох этии баар. Ол аата, киһи барахсан бу орто дойдуга кэлэн барар кэмигэр бар дьонугар туох эрэ үтүөнү-кэрэни айан хаалларбыт буоллаҕына, дьоно кинини умнубаттар, махтана саныыллар.
Ахсынньы 9-с туманнаах күнүгэр биһиги Болугуртан айан суолун тутан, дьоллоох Дьокуускай куорат килбэйэр киинигэр Былатыан Ойуунускай аатынан литературнай музейга саха биллиилээх суруйааччыта, Россия суруйааччыларын сойууһун чилиэнэ, тылбаасчыт, саха тылын учуутала Баһылай Сөдүөтэбис Куолдьарап – Ороһу Уола төрөөбүтэ 90 сылын бэлиэтиир үөрүүлээх түгэӊӊэ сырыттыбыт. Баһылай Куолдьарап Болугурга кэрэспэдьиэн уол кэлэн, «таптал оҕор табыллан, таптаабыта бу сири». Агроном Фаина Платоновна Ушницкаяны (кэлин Саха АССР үтүөлээх агронома) көрсөн, ыал буолан, олохсуйан, 3 оҕоҕо күн сирин бэлэхтээбиттэрэ. Биһиги дойдубутун поэзия киэӊ дуолугар олохтообута.
Киирээти кытта таптыыр суруйааччыбыт мөссүөнэ экраӊӊа бу көстөн, бэйэтинэн кэпсии-ипсии көрсүбүтэ киһини тута-бааччы атын эйгэҕэ киллэрэн кэбистэ. Дьон бөҕө мустубут: суруйааччылар, театр артыыстара, Дьокуускайга «Болугур» түмсүү чилиэттэрэ (салайааччы Маргарита Викитярова), доҕотторо, дьүөгэлэрэ, аймахтара Үөһээ Бүлүүттэн, Амматтан, атын да сиртэн, куораттан тобус-толору олордубут. Баһылай Сөдүөтэбис туйаҕын хатарааччыта, кыыһа, Россия суруйааччыларын сойууһун чилиэнэ, Саха республикатын култууратын туйгуна, суруналыыс, бэйиэт Саргы Куо аҕатын үбүлүөйдээх күнүгэр бар дьонун мунньан, ахтыы киэһэтин саталлаахтык тэрийбит. Манна бэйиэт Ороһу Уолун туһунан сүрдээх истиӊ, чугас ахтыылар кэпсэннилэр, ырыа дьиэрэйдэ, хоһоон этилиннэ.
Литературнай музей директора народнай суруйааччы Николай Алексеевич Лугинов эмиэ бэрт ахтылҕаннаахтык кэпсээтэ. Уйбаан Уһунуускай, Уйбаан Ойуур, Николай Лугинов, Семен Капитонов, Даниил Макеев, Елизавета Мигалкина, Сүүмэх, Уол Сарсын, онтон да атын суруйааччылар кэрэ кэпсээннэринэн бу киэһэни киэргэттилэр. Ырыаһыт Владимир Татаринов «Умнуллубат онус кылааһы» гитаранан доҕуһуоллаан ыллаан, дьон сүрэҕин долгутта. Михаил Санников — Уол Сарсын «Кыыс Амма» диэн ырыанан барыбытын сылаанньытта. Саха сиринээҕи «Айар» кинигэ кыһатын директора Август Васильевич Егоров эмиэ бэрт истиӊник кэпсээтэ.
Дьоно Үөһээ Бүлүүлэр Ороһулар, Тамалакааннар, Ньурбаттан кэлэн кэпсээн ыһыаҕын ыстылар. Биһиги норуот маастара Валентина Васильевна Стручкова – Сарыада Уус, «Бастыӊ баһылыктар» кинигэҕэ киирбит Мария Васильевна Софронова Болугур администрациятын аатыттан (баһылык Петров Андрей Никитич) уонна мин эмиэ кэпсээн-ипсээн, литературнай музейга кэһии туттаран, Саргы Куоҕа сибэкки бэлэхтээн, Ньургун Васильевич Гольдеровка махтанан эттибит.
Саргы Куо бу аҕыйах хонуктааҕыта Москва куоракка АСПИ (Ассоциация союзов писателей и издателей) тэрилтэҕэ «Благословение Иэйэхсит» диэн саӊа кинигэтин таһаартаран кэлбитэ. Биһиги убайбыт, таайбыт, Россия суруйааччыларын сойууһун чилиэнэ, журналист, тылбаасчыт Михаил Васильевич Дьячковскай – Көлбө Мэхээлэ (Москваҕа олорор, нууччалыы суруйар, тылбаастыыр) Саргы Куо хоһооннорун нуучча тылыгар тылбаастаабыт. Онон күндү Саргылаана Васильевнаны бу саӊа кинигэтэ тахсыбытынан эҕэрдэлээн кэбиһэбит! Суруйааччыга хас хоһооно, кинигэтэ оҕотун курдук диэн этии баар. Саргы Куо алгыстаах аартыга субулла, кэӊии, дириӊии турдун диэн баҕа санаабытын этэбит.
Онон, Саргы Куо аҕатын аатын үтүө тылынан ааттатта диэн үөрэн-көтөн эмиэ эҕэрдэлиибит! Норуот таптыыр бэйиэтэ Семен Данилов эппитин курдук, «Алааскар эн мас үүннэрэн хааллардаххына, саас аайы сэбирдэх буолан тыллыаӊ, Күнүӊ сирин таптаан ыллаабыт буоллаххына, күн аайы күнү кытта эн тиллиэӊ».
Источник: амгагазета.рф
