Балаҕан ыйын 17 күнүгэр П.А. Ойуунускай аатынан Литературнай түмэлгэ М.К. Аммосов аатынан ХИФУ естественнай наука салаатын 1 кууруһун устудьуоннара кэлэннэр экскурсиялаан бардылар. Устудьуоннар аан бастаан улуу киһи төрөөбүт балаҕанын куопуйатыгар, дьиэ кэргэнин кытары олорбут мемориальнай дьиэтигэр сырыттылар. Манна кинилэр өбүгэлэрбит оччотооҕу кэмҥэ олорбут олохторун-дьаһахтарын ону ааһан П.А. Ойуунускай олоҕун, айар үлэтин кытары билистилэр. Сахалыы иһити-хомуоһу, Ойуунускай тутта сылдьыбыт уонна да атын суруйааччылар малларын, тээбириннэрин илэ харахтарынан көрдүлэр. Ону таһынан өссө Россия уонна Саха сирин суруйааччыларын сойууһун чилиэнэ, филологическай наука кандидата, Саха Өрөспүүбүлүкэтин култууратын үтүөлээх үлэһитэ, ССРС наукаларын Сибиирдээҕи Академияларын салаатын үтүөлээх бэтэрээнэ, СӨ Духуобунаска академиятын академига Сардаана Платоновна Ойунская төрөөбүтэ 90 сылыгар аналлаах “Ойуунускай Сардааната” диэн саҥа туруоруллубут быыстапканы көрөннөр сөхтүлэр-махтайдылар. Оттон балаҕан ыйын 18 күнүгэр ыраах Чукоткаттан Саха сиригэр ыалдьыттыы кэлбит дьон түмэли уонна быыстапканы олус кэрэхсии көрдүлэр. Онон, ыалдьыттар саха тылынан уус-уран литэрэтиирэтин муҥура суох баай ис хоһоонноох устуоруйатын кытары билсэн билиилэрин хаҥаттылар.
Артем Осипов
