Муус устар 5 күнүгэр күнүс 14.00 чааска П.А. Ойуунускай аатынан литературнай түмэлгэ саха классик суруйааччыларыгар аналлаах квиз-квест оонньуу бэрт сэргэхтик буолан ааста. Оонньууга Дьокуускай куорат 17 нүөмэрдээх орто оскуолатын 5 «в» кылааһын салайааччыта Вилена Ивановна Саввинова үөрэнээччилэрэ кытыннылар. Оонньууну түмэл экскурсовода Тимофей Гаврильев уонна Артем Осипов иилээн-саҕалаан ыыттылар. Манна “Дьөһөгөй” уонна “Дьыҕылар” диэн икки хамаандалар олус көхтөөхтүк кыттан оонньоотулар. Тэрээһин түмүгэр дьүүллүүр сүбэ хас биирдии кыттыбыт оҕоҕо туоһу суругу туттарда уонна минньигэс аһынан күндүлээтэ. Оонньуу саамай долгутуулаах түгэнинэн түмүгү истии буолар. Ол курдук, “Дьөһөгөй” хамаанда бастакы миэстэни ылла. Иккис миэстэҕэ “Дьыҕылар” таҕыстылар. Онон, оҕолор бэрт ураты эйгэлээх киэҥ саалаҕа аҥаардас оонньоон-көрүлээн эрэ буолбакка бэйэлэригэр саҥаны-сонуну иҥэринэн, астынан-дуоһуйан бардылар.
Фоторепортаж: Виталий Слепцов
Автор: Тимофей Гаврильев
