Ыам ыйын 31 күнүгэр П.А. Ойуунускай аатынан Литературнай түмэлгэ «Дьоллоох оҕо саас үөрүүтэ» диэн дьиэ кэргэн түһүлгэтигэр оҕо көмүскэлин күнүн көрсө тэрээһин буолла. Дьиэ кэргэн түһүлгэтигэр Б.А. Горбатюк аатынан Дьокуускай куорат 15 нүөмэрдээх орто оскуолатын иһинэн үлэлиир “Дорогого добра” диэн оҕо доруобуйатын чэбдигирдэр күнүскү лааҕыр алын сүһүөҕүн оҕолоро көхтөөх кыттыыны ыллылар. Оҕолору лааҕыр начальнига Марияна Алексеевна Кузьмина аҕалан кытыннартаата. Манна оҕолорго аан бастаан саха литературатыгар “Оҕо суруйааччылара” диэн иһитиннэрии ыытылынна. Иһитиннэриини түмэл научнай үлэһитэ Ефросинья Семеновна Ноговицына слайданан көрдөрөн кэпсээтэ.
Бэлиэ күнү көрсө оҕолор “Току-току, ньээм-ньээм” диэн ырыа-хоһоон куонкуруһугар уһуйааҥҥа сылдьан үөрэппит хоһооннорун аахтылар. Итиэннэ “Көрдөөх стартар” диэн оонньууга биһилэх былдьаһыыта, алдьаммыт төлөппүөн о.д.а. бэһиэлэй оонньуулары оонньоотулар. Оонньууну Литературнай түмэл үлэһиттэрэ Артем Осипов уонна Тимофей Гаврильев иилээн-саҕалаан ыыттылар. Ырыа-хоһоон куонкуруһугар көхтөөхтүк кыттыбыт оҕолорго “Дьупулуом” туттарылынна. Ону таһынан лааҕыр дириэктэригэр Марияна Алексеевнаҕа оҕолору ситиһиилээхтик аҕалан кытыннарбытын туоһулуур “Махтал сурук” туттарылынна. Оҕолор Ойуунускай төрөөбүт балаҕанын куоппуйатыгар, мемориальнай дьиэтигэр сылдьан экскурсиялаатылар.
![](https://sakhalit.com/wp-content/uploads/2024/06/3-1024x768.jpg)
![](https://sakhalit.com/wp-content/uploads/2024/06/4-1024x768.jpg)
Артем Осипов