Балаҕан ыйын 6 күнүгэр П.А. Ойуунускай аатынан литературнай музейга Россия уонна Саха сирин суруйааччыларын сойууһун чилиэнэ, филологическай наука кандидата, Саха Өрөспүүбүлүкэтин култууратын үтүөлээх үлэһитэ, ССРС наукаларын Сибиирдээҕи Академияларын салаатын үтүөлээх бэтэрээнэ, СӨ Духуобунаска академиятын академига Сардаана Платоновна Ойунская төрөөбүтэ 90 сылыгар аналлаах “Ойуунускай Сардааната” диэн быыстапка аһыллыыта кини төрөөбүт күнүгэр сөп түбэһиннэрэн үөрүүлээх быһыыга-майгыга буолла. Улуу Былатыан балаҕанын куопуйатыгар көмүлүөк оһох оттуллан, аал уоту аһатыы сиэрэ-туома үтүө үгэс быһыытынан буолар. Балаҕан иһэ сылааһынан илгийдэ. Манна Сардаана Платоновна уола Платон Сергеевич уонна кини кэргэнэ Зоя Егоровна бэлиэ тэрээһин аһыллыан иннигэр аал уоту арыылаах алаадьынан айах туттулар.
Бэлиэ тэрээһини иилээн-саҕалаан музей үлэһитэ Ньургуйаана Викторовна ыытта. Быыстапкаҕа Ытык-Күөллээҕи ойуулуур-дьүһүннүүр-литературнай, Ойуунускай аатынан Судаарыстыбаннай, литературнай музей экспонаттара уонна Сардаана Платоновна тус маллара, кинигэлэрэ, рукопистара, дневниктэрэ, хаартыскалара турдулар. Сырдык, үтүө киһи Сардана Ойунская үбүлүөйдээх сылыгар араас биллэр-көстөр ыалдьыттар, учуонайдар, суруйааччылар, преподавателлэр кыттыыны ылан эҕэрдэ бастыҥын анаан астынан-дуоһуйан бардылар. Ол курдук, култуура миниистирэ Афанасий Ноев, саха народнай суруйааччыта литература музейын директора Николай Лугинов, саха народнай поэта Наталья Харлампьева о.д.а. Маны таһынан эдэр көлүөннэ ыччат тоҕуоруһа түмсэн киэҥ сааланы ылбыта кэрэхсэбиллээх. Афанасий Ноев Сардаана Ойунская кыыһыгар Мария Сергеевнаҕа уонна кийиитигэр Зоя Егоровнаҕа сибэкки дьөрбөтүн үөрүүлээх быһыыга-майгыга туттарда. Саха тыйаатырын артыыстара үөрүүлээх тэрээһини Ойуунускай хоһоонунан киэргэттилэр. Ол курдук, саха народнай артыыската Зоя Багынанова, СӨ култууратын туйгуна Матрена Седельникова уонна эдэр талааннаах артыыстар Аида Еремеева, Юлия Санникова хомоҕой хоһоону иэйиилээхтик аахтылар. Тэрээһин түмүгэр Сардаана Ойунская кыыһа М.К. Аммосов аатынан ХИФУ филологическай бакылтыат “Русский язык как иностранный” хаапыдыра аҕа учуутала Мария Сергеевна Соловьева ийэтин быыстапкатын көрөөччүлэр болҕомтолоругар сиһилии кэпсээтэ. Онон, ыҥырыылаах ыалдьыттар үтүө киһи сырдык мөссүөнүн санаан, кини олоҕун, айар үлэтин кэрэһэлиир баай ис хоһоонноох быыстапканы көрөн сөҕөн-махтайан бардылар. Санатан эттэххэ “Ойуунускай Сардааната” быыстапка 2024 сыл сэтинньи ыйыгар диэри туруоҕа.
Артем Осипов
