Балаҕан ыйын 6 күнүгэр П.А. Ойуунускай аатынан литературнай музейга киһи кэрэмэһэ – С.П. Ойунская төрөөбүтэ 90 сылыгар аналлаах дьикти алыптаах “Ойуун эйгэтигэр” диэн квест-оонньуу оруобуна бэлиэ күҥҥэ сөп түбэһиннэрэн буолла. Манна Дьокуускай куорат бастакы нүөмэрдээх орто оскуолатын орто, үрдүкү сүһүөҕүн оҕолоро кыттыыны ыллылар. Оҕолору саха тылын уонна литературатын учуутала Анна Даниловна Попова аҕалан кытыннартаата. Оҕолор аан бастаан С.П. Ойунскаяҕа аналлаах быыстапканы көрдүлэр, үтүө киһи олоҕун, айар үлэтин туһунан сиһилии кылгастык билистилэр.
Оонньуу барыта биэс түһүмэхтэн турар. Ол курдук, кистэммит чороону булан таҥан тыл таһаарыахтаахтар. Хас биирдии хамаандаҕа анал карталаах. Ол картанан сирдэтинэн кистэммит хаартыскалары, суруйааччылар ааттарын булаллар. Салгыы Дьулуруйар Ньургун Боотур олоҥхо дьоруойдарын, саха национальнай символларын ааттарын таайыы, быһаарыы. Оонньуу бүтэһик түһүмэҕэ таабырын таайсыыта.
Оҕолор үс хамаандаҕа арахсан оонньоотулар. “Үрдэл” диэн 1,2,3 нүөмэрдэринэн сырыттылар. Кинилэр оонньуу ис хоһоонун тута өйдөөн олус үчүгэйдик киирэн тураннар кытыннылар, сэргэхсийдилэр, биһирээтилэр. Уопсай түмүгү ылан көрдөххө “Үрдэл — 3” – 1, “Үрдэл — 2” – 2, “Үрдэл — 1” – 3 миэстэ. Хас биирдии кыттыбыт оҕолорго “Туоһу сурук”, кыайыылаах хамаандаҕа минньигэс сакалаат бэрилиннэ. Оттон оскуола учууталыгар Анна Даниловнаҕа “Махтал сурук” туттарылынна.
Артем Осипов
