Ойуунускай музейыгар өр сылларга үлэлээбит, кини кута-сүрэ, тыына буолбут Раиса Терентьевна Аммосова баара буоллар от ыйын 14 күнүгэр 2024 сыллаахха 83 сааһын туолуохтаах этэ…
Раиса Терентьевна баарына диэн кэпсэтэбит билигин… Ол саҕанааҕы хаартыскалары көрөн ахтан-санаан ааһыаҕы баҕарыллар.
Раиса Терентьевна бүтэһик сайыныгар музей үлэтин чэрчитинэн “Ойуунускай уонна Кулантай” диэн Уус Алдан улууһун Чараҥ бөһүөлэгэр Зоя Васильевна уонна норуодунай суруйааччы Иван Васильевич Мигалкиннар тэрийбит В.А.Протодьяконов-Кулантай аатынан литературнай музей-комплексыгар биһиги музейбыт дьоҕус кэллэктиибэ от ыйын куйааһа сатыылаан турдаҕына тахса сылдьыбыппыт. Чараҥҥа ийэтинэн Бурцевтар аймахтара биһигини музей үлэһиттэрин үөрэ-көтө көрсүбүттэрэ.
Раиса Терентьевна биһигини илдьэ сылдьыбыт бу сырыыта, кэлин санаатахха, кини дьонун-сэргэтин кытта быраһаайдаһыыта буолан тахсар эбит. Кэлбит күммүт киэһэтигэр Раиса Терентьевна олоҕун, үлэтин-хамнаһын кэпсиир, отчуоттуур да диэххэ сөп, айар киэһэтэ буолбута. Онно Раиса Терентьевна оҕо сааһын туһунан Чараҥ дьоно-сэргэтэ оонньоон көрдөрөн кинини олус долгуппуттара. Биһиги Раиса Терентьевна туруоруутунан Суорун Омоллоон “Сайсары” драматын оонньоон көрдөрбүппүт. Биһигини кытары Н.Е.Винокуров-Урсун барса сылдьан Терентьевна музейга анаабыт олоҕун, үлэтин туһунан иҥэн-тоҥон туран кэпсээбитэ. Бу дьоро киэһэ кэннэ сахалыы астаах, ырыалаах-тойуктаах остуол тэрийбиттэрэ.
Сарсыҥҥы күҥҥэ түөрт – Кэбээйи, Нам Чаҕылҕан, Кулантай литературнай музейдарын үлэһиттэрэ мустан сүбэлэһэн, опыт атастаһан, үлэ-хамнас туһанан кэпсэппиппит. Раиса Терентьевна, онно төһө да ыалдьа сырыттар инники сылдьыбыта, кэпсиирэ-ипсиирэ, тыл этэрэ барыта кэрэхсэбиллээҕэ. Ону баара биһиэхэ биллэрбэккэ эрэ, аргыый сылдьан үлэтин-хамнаһын бу тиһэх Чараҥҥа сырыытынан түмүктээбит эбит. Ити ээ, үтүө киһи сирдээҕи олоҕу сырдыктык, аргыый-наллаан быраһаайдаһан түмүктүүрэ, барыыта …
Орто дойдуттан арахсыбыта бу сыл балаҕан ыйыгар онус сыла буолар. Күн-дьыл аастар ааһан иһэр, оттон Раиса Терентьевна туһунан син биир бу музей баарын тухары кинини өйдүүбүт, ахтабыт, саныыбыт.
Бастакы хаартыска: Декабрина Иванова, Настя Лугинова, Раиса Терентьевна, Люция Никандровна, Ульяна Дмитриевна (Нам, Чаҕылҕан музейа), мин, Надежда Иванова. Чараҥҥа Литературнай музей тэлгэҺэтигэр, Уус Алдан.
14.04.2024
Музей үлэһитэ Нюргуяна Халгаева
