П.А. Ойуунускай аатынан Литературнай музейга сылдьар дьон бары Декабрина Петровна Иванованы билэллэр. Кини музейга уһуннук үлэлээбит буолан аптарытыата улахан. Биһиги бэйэбит киниттэн ыйытарбыт, сүбэлэтэрбит элбэх.
Декабрина Петровна хас да сыллааҕыта сунтаардартан төрүттээх баяныистар тустарынан кинигэ тахсарын истэн долгуйбут этэ. Онно билбитим кини аҕата талааннаах баянист буоларын, ол да иһин С.А. Зверев – Кыыл Уолун аатырбыт ансаамбылыгар ыҥырыллан оонньуурун. Декабрина Петровна барахсан аҕатын өйдөөбөт, олох кыратыгар өлбүт эбит. Ол эрээри кырачаан кыыһыгар айар дьоҕуруттан дэлэгэйдик бэрсибит. Ол курдук биһиги Декабринабыт туойар, ыллыыр, сахалыы ырыалары, толорооччулары барыларын билэр. Эдьиийэ Людмила күлээччи: “Миэхэ талаан суох, ас астыыры эрэ сатыыбын”, — диэн.
Петр Афанасьевич Гуринов хаартыската, дьолго, С.А. Зверев – Кыыл Уолун аатынан музейыгар баар эбит. Көрдөһөөппүтүн кытары музей үлэһиттэрэ ыыта охсубуттарыгар наһаа махтаммыппыт.
“Аймахтара кининэн киэн тутталларын, таптыылларын туһунан билэн бэйэм да долгуйдум. Аҕа курдук аҕалаах эбиппин диэн саныырга да үчүгэй”, — диэн суруйбут Декабрина Петровна. “Кыыһым, эһэтин батан, музыкант. Скрипкаҕа оонньуур”, — диэн эбэн эппит. Кыыһын аатын суруйбатах. Оттон кыыһа Саха сирэ барыта киэн туттар киһитэ эбээт. Ама ким билбэт үһү “Виртуозы Якутии” ансаамль солисткатын, СӨ үтүөлээх артискатын Фрося Ефимованы?!
Петр Афанасьевич кыра кыыһа төрөөбүтүгэр ыалдьа да сырыттар үөрээхтээбитэ буолуо, оҕотугар бары үтүөнү баҕараахтаабыта буолуо. Ол да иһин кини улахан талаана кыыһыгар, сиэнигэр бэрилиннэҕэ дии.
Аны кинигэҕэ Декабрина Петровна таайа Иванов Валерий Герасимович эмиэ баар. Кини эмиэ культура үтүөлээх үлэһитэ, билигин даҕаны баянын кыбына сылдьар киһи. Сотору-сотору музейбытыгар сылдьааччы.
Бу кинигэ тахсыбытынан Декабрина Петровнабытын эҕэрдэлиибит, аҕатын аатын үйэтиппититтэн үөрэбит. Баҕарабыт чэгиэн доруобуйаны, уһун дьоллоох олоҕу.
![](https://sakhalit.com/wp-content/uploads/2024/07/vN428K-bDc-1.jpg)
Е. Ноговицына, музей научнай үлэһитэ