2024 сыл Арассыыйаҕа Дьиэ кэргэн оттон Саха сиригэр оҕо саас сыла. Бэлиэ сылга сөп түбэһиннэрэн ыам ыйын 18 күнүгэр П.А. Ойуунускай аатынан Литературнай түмэлгэ түмэл аан дойдутааҕы күнүн улахан тэрээһинэ буолан ааста. Ол курдук, “Айарт” диэн Өрөспүүбүлүкэтээҕи уопсастыбаннай тэрилтэтэ “Уһуктуу” диэн айар тэрээһинэ ыытылынна. Тэрээһин буолуон аҕай иннигэр литературнай түмэл тэлгэһэтигэр сахалыы үгэс быһыытынан алгыс сиэрэ-туома буолла. Манна “Айар” кинигэ кыһата оҥорон таһаарбыт саҥа кинигэлэрин, хартыыналарын атыы-быыстапката турда. Ону таһынан “Ньургуһун” диэн Өрөспүүбүлүкэтээҕи уус-уран-литературнай куонкурус түмүгэ биллэрилиннэ. ЯРОО ОТИ – “Айарт” бөлөҕүн уонна чилиэттэрин кэнсиэрэ тэрээһини өссө ордук киэргэттэ.
Киэһэлик 16.00 ч. аан дойдутааҕы түмэл күнүнэн «Мимуоза» уран дьүһүлгэн салона олус сэргэхтик, истиҥ эйгэҕэ буолла. Тэрээһини иилээн-саҕалаан Маргарита Иванова-Дайар Суһум ыытта. Мимуоза барыта 5 түһүмэххэ арахсан ыытылынна. Ол курдук, “Ойуунускайга сүгүрүйүү” диэн чаҕылхай биэчэргэ норуот суруйааччыта Н.В. Михалева — Сайа сэһэнин хас биирдии кэлбит ыалдьыт умсугуйан туран иһиттэ. Кыайыы кыыһа – Сайа төгүрүк 60 сааһын туолбутунан түмэл дириэктэрин солбуйааччыта Л.Н. Иванова сибэкки дьөрбөтүн бар дьон иннигэр үөрүүлээх быһыыга-майгыга туттарда. Тэрээһин иккис чааһынан “Историяны, олорбут олохпутун кэрэһилиир айымньылар” диэн. Бэртээхэй кэпсэтиһиигэ суруйааччы Василий Гоголев-Уйулҕан, Яков Алексеев, тыл билимин кандидата, дассыан, литературовед Саргылаана Ноева кыттыыны ыллылар. Үһүс түһүмэх «Хоһоон суһума» диэн телевизионнай барыл кыттыылаахтарын кытта көрсүһүү буолла. Оттон “Дьааҥы олоҥхотун, ырыаларын уратылара” диэн төрдүс түһүмэххэ Дьааҥы улууһун кииннэммит библиотекатын кыраайы үөрэтэр салаатын үлэһитэ, ырыаһыт, олоҥхоһут Саргылаана Слепцова-Хатан Кылаан кыттыыны ылла. Кини истиҥ истээччилэргэ олоҥхо алыптаах эйгэтин утары уунан уунан бэлэхтээтэ. Онон, түмэл күнүгэр анаммыт сэргэх улахан тэрээһин Дьааҥы һээдьэтинэн түмүктэннэ.
Автор: Артем Осипов
