Муус устар 11 күнүгэр П.А. Ойуунускай аатынан Литературнай түмэлгэ Россия Суруйааччыларын сойууһун чилиэнэ, СӨ бэчээтин уонна култууратын туйгуна, прозаик, суруналыыс Иван Иванович Осипов – Уйбаан Ойуур 65 үбүлүөйдээх сааһыгар аналлаах айар биэчэрэ уонна “Дьону үөрдэ сырыттарбын” диэн саҥа буруолуу сылдьар хоһооннорун кинигэтин сүрэхтэниитэ истиҥ эйгэҕэ буолан ааста. Истиҥ биэчэри түмэл дириэктэрин солбуйааччыта Линда Николаевна Иванова иилээн-саҕалаан ыытта. Киэҥ саалаҕа суруйааччы айар үлэтин туоһулуур быыстапката турда итиэннэ уруһуйдаабыт уруһуйдара хас биирдии кэлбит ыалдьыкка ураты эстетическай дуоһуйууну биэрдэ. Манна кини чугас дьоно, аймахтара бииргэ үөрэммит доҕотторо, үөлээннээхтэрэ, СӨ норуодунай бэйиэтэ Н.И. Харлампьева, СӨ Суруйааччыларын сойууһун чилиэнэ, СӨ үөрэҕириитин уонна култууратын туйгуна В.И. Гоголев – Уйулҕан, “Чолбон” сурунаал сүрүн эрэдээктэрэ Г.Г. Андросов, РФ суруналыыстарын сойууһун чилиэнэ, Арассыыйа суруйааччыларын сойууһун чилиэнэ, поэт Яна Байгожаева дьоро киэһэҕэ кыттыыны ыллылар. Уйбаан Ойууру итии-истиҥ тылынан эҕэрдэлээтилэр, барҕа махтал тылын уонна инники айар үлэтигэр ыллыктаах тылларын анаатылар.
Фото с мероприятия Виталия Слепцова
