Аан дойду таһымнаах, саха народнай суруйааччыта Николай Лугинов үбүлүөйдээх 75 сааһын Былатыан Ойуунускай аатынан Саха тыйаатырыгар бэлиэтээтибит.
Николай Алексеевич саха литэрэтиирэтин, духуобунаһын сайдыытыгар үтүө үлэтин үрдүктүк сыаналаан, үбүлүөйдээх сылыгар Ил Дархан Айсен Николаев дьаһалынан тэрийэр кэмитиэт тэриллибитэ. Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Местников салайыытынан былааннар, дьаһаллар ылыныллан, сыл устата норуоттар икки ардыларынааҕы, Арассыыйа, өрөспүүбүлүкэ таһымнаах бөдөҥ тэрээһиннэр ыытыллыннылар.
Николай Алексеевичка, үлүскэннээх түбүктээх үлэтин үрдүктүк сыаналаан туран, махталбытын тиэрдэбит. Саха литэрэтиирэтэ, култуурата сайдарыгар биир сүдү суолу арыйбыт суруйааччы быһыытынан киэн туттабыт, айымньылаах олоҕо албаннаах аартыгынан өр сылларга кэрэни-сырдыгы түстүү турдун диэн алгыспытын аныыбыт!
Источник: Официальный телеграм канал министра культуры и духовного развития Республики Саха (Якутия) Афанасия Ноева
Ссылка: https://t.me/afanasiy_noev/851
