You are currently viewing Саха театра Ийэ сылын Аан Дархан махталынан түмүктээтэ

Саха театра Ийэ сылын Аан Дархан махталынан түмүктээтэ

СӨ Ил Дарханын ыйааҕынан 2022 сыл Саха сиригэр Ийэ сылынан биллэриллибитэ.

Ахсынньы 27 күнүгэр Саха театра Ийэ сылын «Аан Дархан махталым Ийэҕэ» диэн хоһоон түһүлгэтинэн түмүктээтэ. Хоһоонунан дьүһүйүүнү СӨ норуодунай артыыската, П.А. Ойуунускай аатынан бириэмийэ лауреата Зоя Багынанова көҕүлээн, артыыс, режиссёр Семён Ченянов туруорда. Дьүһүйүүгэ Саха сирин норуодунай суруйааччыта Иван Гоголев-Кындыл «Аан Дархан махталым» сонетын тула саха суруйааччыларын хоһоонноро киирдилэр.

Арассыыйа уонна СӨ үтүөлээх артыыһа Пётр Баснаев «Кыым» хаһыакка тахсыбыт литературовед учуонай, П.А. Ойуунускай аатынан бириэмийэ лауреата Варвара Борисовна Окорокова «Саха литературатыгар ийэ уобараһа» ыстатыйатыттан СӨ норуодунай суруйааччыта Дмитрий Наумов «Сталин мэтээлэ» уонна Семён Маисов «Ийэм кэпсиир» айымньыларыттан быһа тардыыны, СӨ норуодунай суруйааччыта Наталья Михалёва-Сайа уонна Афанасий Гуринов-Арчылан ийэлэригэр анаабыт хоһооннорун аахта.

Ытык-мааны Зоя Петровна Багынанова Иван Гоголев-Кындыл «Айыы санаа араҥаччылаа» поэматыттан «Ийэ алгыһын», итиэннэ оҕо сааһын дьүөгэлэрэ Домна Слепцова «Кэпсэтии», Лариса Максимова «Ийэм былаата» хоһооннорун долгута аахта.

71JYgFoivyI

Айталина Цыпандина саха бастакы поэтессата Варвара Потапова «Үөскүү да, төрүү да илик…» хоһоонун, Айталина Лавернова поэтесса Яна Байгожаева «Үрдүк дьол», СӨ үтүөлээх артыыската Маргарита Борисова СӨ Ил Дарханын гранын көмөтүнэн тэриллибит «Айыы арчыта» куонкурус кыайыылааҕынан ааттаммыт Бурхалей Макаров «Ийэм чэйэ» хоһоонун уонна Николай Нутчин-Дьуур «Ийэҕит түннүгэ уоттааҕар ыалдьыттааҥ…» хоһооннорун аахпыттарын истиҥник иэйэ иһиттибит.

Z 0V44Qwzxg

Ньургуйаана Шадрина СӨ норуодунай суруйааччыта Елена Слепцова-Куорсуннаах «Ийэм күүтэр», СӨ үтүөлээх артыыската Ирина Никифорова саха биллиилээх поэтессата Саргы Куо «Амманы санаатахпына», СӨ үтүөлээх артыыската Надежда Ушницкая Валентина Комиссарова-Күлүмүрэ «Кырдьаҕас ийэбэр», «Ийэкэм сайынныын алтыһар», СӨ үтүөлээх артыыската Елизавета Потапова Иван Гоголев-Кындыл «Аан Дархан махталым» сонетын долгутуулаахтык ааҕан көрөөччү дууһатын таарыйдылар.

Иван Гоголев-Кындыл «Аан Дархан махталым» сонетын Сибиир биллиилээх поэтессата Нелли Закусина «Земной поклон» диэн ааттаан тылбаастаабытын СӨ үтүөлээх артыыһа Василий Борисов уонна Саха театрын эдэр артыыстара Василий Белолюбскай, Айсен Лугинов нууччалыы ааҕан иһитиннэрдилэр.

Поэзия киэһэтин биир бэлиэ түгэнэ диэн, Саха театрын артыыската Александра Сивцева Мария Алексеева-Арылы Дуйдаах «Дьикти сайын тоҕо эрэ…» хоһоонугар матыып айан гитараҕа доҕуһуоллаан ырыа сүрэхтээтэ.

al AX91MBSM

Күн сирин көрдөрбүт күн күбэй ийэлэргэ анаммыт поэзия киэһэтин Саха театрын артыыстара суруйааччы, суруналыыс Степан Дадаскинов тылыгар уонна Владимир Индигирскэй мелодиятыгар дьон-сэргэ таптаан истэр «Ийээ, сыллаан ылыым дуу?» ырыанан түмүктээтилэр.

Надежда ИЛЬИНА.

Источник: kyym.ru

Ссылка: https://kyym.ru/sonunnar/kultura/10346-sakha-teatra-ije-sylyn-aan-darkhan-makhtalynan-t-m-kteete

Loading