Саха-кэриэй орто оскуолатын иһинэн үлэлиир “Лингва+” лааҕырын орто сүһүөҕүн оҕолоро бэс ыйын 19 күнүгэр П.А. Ойуунускай аатынан Литературнай түмэлгэ убаастабыллаах иитээччилэрин уонна баһаатайдарын кытары бары тутуспутунан кэлэннэр “Сайыны бииргэ көрсөбүт” диэн сайыҥҥы оҕо сынньанар лааҕырыгар аналлаах тэрээһиҥҥэ актыыбынайдык кытыннылар.
Манна буоларын курдук түмэл үс дьиэтигэр экскурсияны Яна Поскачина, Тимофей Гаврильев уонна Артем Осипов ыыттылар. Оҕолор аан бастаан улуу киһи Былатыан Ойуунускай төрөөбүт балаҕанын куопуйатыгар, дьиэ кэргэнин кытары олорбут мемориальнай дьиэтигэр сырыттылар. Манна кинилэр өбүгэлэрбит оччотооҕу кэмҥэ олорбут олохторун-дьаһахтарын кытары сиһилии билистилэр. Сахалыы иһити-хомуоһу, Ойуунускай тутта сылдьыбыт малларын илэ харахтарынан көрдүлэр. Саха тылынан уус-уран литэрэтиирэтин муҥура суох баай ис хоһоонноох устуоруйата, экспозициялара, туруоруллубут быыстапкалара, историческай хаартыскалара – бу барыта түмэл сүдү, сүрүн кэрэ көстүүлэрэ. Ыалдьыттар субу сэргэх сэһэн, сөҕүү-махтайыы кэннэ эстетическай дуоһуйууну ыллылар.
Сайыҥҥы сөрүүн салгыҥҥа сүүрүүлээх-көтүүлээх квест-оонньуу анал чааһа үүннэ. Оҕолор бары даҕаны оонньууну күүтэллэр. Бу сырыыга кинилэри икки хамаандаҕа арааран оонньоттубут. Орто сүһүөххэ үөрэнэр оҕолор диэтэххэ бэрт сэргэхтик кытыннылар. Хамаандалар араас өҥүнэн бэлиэтэнэн кистэммит кэнбиэри тута буланнар ыытааччыга бэриллибит сорудаҕы түргэнник толордулар. Холобура, “Кириешки” хамаандата түмэлгэ киирэн истэххэ киһи хараҕар тута быраҕыллар Ойуунускай бүүһүгэр кистэммит кэнбиэри тута була охсоннор Былатыан хоһоонун нууччалыы тылбааһын иэйиилээхтик аахтылар. Оттон квест-оонньуу кэннэ аны биктэриинэлээх “квиз-оонньуу” буолла. Оҕолор бэйэлэрин хамаандаларынан киирсэн боппуруостарга харса суох хоруйу биэрдилэр. Сорох боппуруостарга ыарырҕаттылар эрээри чэпчэтии түмүгүнэн дьүүллүүр сүбэ ону сиһилии быһааран-өйдөтөн биэрдэ. Холобура, Сахабыт сиригэр сайын үүнэр сир аһыттан биирдэстэрэ “ыт тиҥилэҕэ” бэрт минньигэс, өлгөмнүк үүнэр сир аһа буолар. Оҕолор манна ыт тиҥилэҕин атын сир аһын кытары булкуйдулар. Онон, оонньуубут биктэриинэнэн түмүктэннэ. Уопсай түмүгү ыллахха “Кириешки” хамаандата бастаата. Оттон “Эшкерики” хамаандата иккис миэстэ. Ону таһынан иитээччилэргэ Майя Никифоровнаҕа, Алина Юрьевнаҕа уонна Саина Александровнаҕа “Махтал сурук” бэрилиннэ. Тэрээһин бэрт үрдүк таһымҥа ааста. Кыттааччылар бэйэ-бэйэлэригэр дохсун ытыс тыаһын бэлэхтэстилэр.
Артем Осипов
