Слепцов Анатолий Игнатьевич сэтинньи 25 күнүгэр 1968 с. Саха АССР Алексеевскай оройуон (билиҥҥи Таатта улууһа) Ытык Күөл сэлиэнньэтигэр күн сирин көрбүтэ.

1985 с. орто оскуоланы бүтэрэн Дьокуускайдааҕы 11 №-дээх СПТУ-ҕа автослесарь идэтигэр үөрэммитэ. Сыл аҥара “Сельхозтехника” тэрилтэтигэр үлэлээбитэ. Армияҕа  сулууспатын Монголия народнай республикатыгар ааспыта, рота санинструктарын идэтин баһылаабыта. 1988 с. младшай сержант званиялаах демобилизацияламмыта.

1989 сыл сайыныгар дылы араас үлэҕэ үлэлээбитэ. Ол сыл Алданнааҕы медицинскай училище фельдшерскай отделениятыгар киирэн 1992 сыллаахха кыһыл дипломунан бүтэрбитэ. Тааттатааҕы киин балыыһа инфекционнай отделениятыгар медбратынан, “Суһал көмө” фельдшеринэн үлэлээбитэ.

1993-1999 сс. М.К. Аммосов аатынан СГУ Медицинскэй институтун лечебнай факультетын кыһыл дипломунан үөрэнэн бүтэрбитэ. Саха Республикатын студеннарга анал стипендиатын хаһаайына. 1999-2001 сс. М.К. Аммосов аатынан СГУ Медицинскэй институтун хирургия ординатуратыгар үөрэммитэ. Үөрэҕин бүтэрэн Таатта улууһун киин балыыһатыгар хирурунан үлэтин саҕалыыр. Тааттатааҕы киин балыыһа кылаабынай бырааһын солбуйааччытынан, 2003 сылтан Таатта улууһун киин балыыһатын хирургия отделениятын сэбиэдиссэйинэн үлэлиир.

2002 – 2007 сс. Таатта улууһун сүбэ мунньаҕын депутатынан талыллыбыта. “Таатта улууһа” муниципальнай тэриллии устаабын оҥорууга уонна ылыныыга олохтоохтук үлэлэспитэ.

2007 с. үчүгэй үлэтин иһин Российскай Федерация Доруобуйа харыстабылын министерстватын бочуотунай грамотатынан бэлиэтэммитэ, 2014 с. “РФ доруобуйа харыстабылын туйгуна” бэлиэнэн наҕараадаламмыта.

2004 сылтан бэчээттэнэр, 2015 с. Россия суруйааччыларын союһун чилиэнэ.