Семен Осипович Никифоров (27.08.1923-15.08.1980) – прозаик. Аҕа дойду сэриитин кыттыылааҕа. Саха АССР культуратын үтүөлээх үлэһитэ. 1950 сылтан ССКП чилиэнэ. 1965 сылтан ССРС суруйааччыларын союһун чилиэнэ.

1923 сыллаахха атырдьах ыйын 27 күнүгэр Мэҥэ-Хаҥалас оройуонун II Тыыллыма нэһилиэгэр төрөөбүтэ. 1942 с. Дьокуускайдааҕы культурнай-сырдатар оскуоланы бүтэрэн Кыһыл чуум сэбиэдиссэйинэн үлэлээбитэ.

С.О.Никифоров 1943 с. Армияҕа ыҥырыллыбыта уонна сэрии бүтүөр диэри Фронт инники кирбиитигэр сэриилэспитэ, Берлини ылсыбыта. Дойдутугар 1947 сыллаахха эргиллибитэ. Оройуон хаһыатын редакторынан, ЫБЛКС райкомун бастакы сэкирэтээринэн, ССКП райкомун отделын сэбиэдиссэйинэн үлэлээбитэ. Дьокуускайга уобаластааҕы партийнай оскуоланы бүтэрбитэ. «Хотугу сулус» сурунаал редакциятыгар  о.д.а. тэрилтэлэргэ үлэлээбитэ.

1961 сыллаахха кэпсээннэрин бастакы хомуурунньугун бэчээттэммитэ.1969 с.кэпсээннэрин, сэһэннэрин түмэн «Дойдум дьоно» кинигэтин таһааттарбыта. «Туркулах кистэлэҥнэрэ», («Тайны Туркулаха»), («Плодородная долина») сэһэннэр автордара. Сэбиэскэй саллааттар сэрии уоттаах толоонугар бойобуой, хорсун быһыыларын-майгыларын «Саллаат дьылҕата» кинигэтигэр суруйбута.

Суруйааччы айымньыларын геройдарынан Хоту дойду тулуурдаах дьоно, тыа хаһаайыстыбатын туруу үлэһиттэрэ, учууталлар, суруналыыстар, хорсун-хоодуот саллааттар, эйэлээх олоҕу тутааччылар буолаллар.

Албан Аат III степеннээх орденынан, бойобуой мэтээллэринэн, Бочуотунай грамотанан наҕараадаламмыта.