1985 сыллаахха олунньу 6 күнүгэр Булуҥ улууһун Күһүүр нэһилиэгэр күн сирин көрбүтэ. 2002 сыллаахха Үөһээ Дьааҥы улууһун Адыаччы орто оскуолатын туйгуннук үөрэнэн бүтэрбитэ. 2007 сыллаахха М.К.Аммосов аатынан Саха государственнай университетын Саха филологиятын уонна культуратын факультетын бүтэрбитэ. Идэтинэн – саха тылын учуутала.

2007-2011 сылларга бүтэрбит оскуолатыгар учууталынан, директоры солбуйааччынан үлэлээбитэ. Бу сылларга нэһилиэк сэбиэтигэр депутатынан талыллыбыта, оскуола профсоюһун салайбыта.

2011 сылтан күн бүгүҥҥэ диэри Дьокуускай куорат “Айыы Кыһата” оскуолаҕа директоры солбуйааччынан, саха тылын уонна литературатын учууталынан үлэлиир.

Айар үлэтэ хаһыакка, сурунаалга хоһоонноро, кэпсээннэрэ бэчээттэнииттэн саҕаламмыта. Ол курдук, Арчы Уола айымньылара “Саха сирэ”, “Кыым”, “Кэскил”, “Орто дойду сонуннара”, о.д.а. хаһыакка, “Чолбон” сурунаалга, араас хомуурунньукка бэчээттэммиттэрэ. Бастакы кинигэтэ 2006 сыллаахха Булуҥҥа “Санаа ситимэ” диэн ааттанан тахсыбыта, иккис кинигэтэ “Олук тыл” 2007 сыллаахха “Бичик” кинигэ кыһатыгар бэчээттэммитэ. Бу кинигэ 2007 сыллаахха “Печатный двор Якутии” быыстапка-дьаарбаҥкаҕа “Дебют” номинацияҕа I степеннээх дипломунан бэлиэтэммитэ.

Суруйар темата – саха киһитин олоҕо-дьаһаҕа, омук дьылҕата, эр киһи уонна дьахтар сыһыаннаһыыта. Студенныыр сылларыгар “Эн миигин умнумаар, Сэргэлээх” хоһооно ырыа буолан киэҥник ылланар.

Россия суруналыыстарын Сойууһун чилиэнэ (2007), Россия суруйааччыларын Сойууһун чилиэнэ (2013), Саха Республикатын Норуот педагогикатын Ассоциациятын бырабылыанньатын чилиэнэ (2013), Дьокуускай куорат төрүт оскуолалар ситимнэрин сэбиэтин чилиэнэ (2013).