П.А. Ойуунускай аатынан литература судаарыстыбаннай түмэлигэр бэчээккэ, көрдөрөр-иһитиннэрэр эйгэҕэ сахалыы тыыны олохсутуу, саха тылын туттуу нуормаларын тула кэпсэттибит. СӨ инновацияҕа, цифровой сайдыыга уонна инфокоммуникационнай технологияҕа министиэристибэтиттэн, СӨ үөрэх уонна билим министиэристибэтиттэн, Гуманитарнай чинчийии уонна хотугу аҕыйах ахсааннаах омуктар проблемаларын институтуттан, Саха сиринээҕи суруналыыстар сойуустарын бырабылыанньатыттан, СӨ Ил Дарханын Дьаһалтатын уонна СӨ Бырабыыталыстыбатын иһинэн үлэлиир Тыл сайдыытын боппуруостарын сүрүннүүр салалтаттан, ХИФУ Хотугулуу-Илиҥҥи норуоттар тылларын уонна култуураларын үнүстүүтүттэн, бэчээттэн уонна көрдөрөр-иһитиннэрэр эйгэттэн чинчийээччилэр, суруналыыстар, салайааччылар, уопсастыбаннас кытыннылар.

Өрөспүүбүлүкэ хаһыаттарыгар, сурунаалларыгар, саҥа тахсар кинигэлэргэ уонна көрдөрөр-иһитиннэрэр эйгэҕэ төрөөбүт тылы туттуу туругун ырытан көрөн баран төгүрүк остуол кыттыылаахтара чопчу бэлиэтээһиннэри оҥордулар. Бэрт сэргэх сэһэргэһии буолбутун бэлиэтээтилэр, түмүккэ өрөсөлүүссүйэ ылыннылар. Маннык тэрээһин түмэлгэ үгэс быһыытынан тэриллэригэр баҕардылар. Төрүрүк остуол туһунан уонна өрөсөлүүссүйэ «Кыым» хаһыат саҥа нүөмэригэр тахсыаҕа.

Ангелина КУЗЬМИНА,

түмэлгэ билим ыстаарсай үлэһитэ