«Сахам сирэ барахсан» аан дойдуга дьиэрэйдэ

 

Бүлүү улууһун баһылыга С. Н. Винокуров үүммүт 2020 сылга нэһилиэктэр баһылыктарын кытта бастакы көрсүһүүтүгэр саха народнай поэта, прозаик, драматург, Российскай Федерация культуратын үтүөлээх үлэһитэ, Саха АССР искусстволарын үтүөлээх деятелэ, Саха комсомолун бириэмийэтин лауреата, Россия уонна Саха сирин литературнай бириэмийэлэрин лауреата, Бүлүү оройуонун Ытык киһитэ Иван Михайлович Гоголев-Кындыл төрөөбүтэ 90 сылын тэрээһиннээхтик ыытыы туһунан кэпсэтиигэ улуус поэт тылларыгар, композитор Грант Григорян музыкатыгар үйэ аҥарыттан ордук саха норуотун уоһуттан түспэтэх “Сахам сирэ барахсан” ырыатыгар флешмоб тэрийэргэ баһылыктар этии киллэрбиттэрэ уонна тэрээһини саҕалаан барбыттара.

Культура уонна духуобунай сайдыы Министерствота (министр Ю.С.Куприянов) бастакынан өйөөн республикаҕа флешмоб-акцияны биллэрбитэ.

Ыҥырыы чэрчитинэн поэт терөөбүт күнүттэн – тохсунньу 18 күнүттэн тохсунньу 30 күнүгэр дылы биллэриллибит флешмобка аан дойду араас муннуктарыгар олохсуйбут, төрөөбүт дойдуларын ахтар-саныыр сахалар, Саха сирин кытта олохторун сибээстээбит араас омуктар бэрэстэбиитэллэрэ, Россия араас куораттарыттан, Саха сирин үгүс улуустарыттан, нэһилиэктэриттэн 2000 тахса киһи кыттыбыт 100-тэн тахса видео-устууну интернет ситимигэр киллэрдилэр.

Кинилэр ортолоругар Венгрияттан биир дойдулаахтарбыт Анна уонна Анатолий Протопоповтар, Анна Аргылова, Галина Чуприна, Александр Кириллович Павлов дьэ кэргэнэ, Сергей Расторгуев, Калифорнияттан Инга Нессинг, Сербияттан Эдуард Лугинов, Турцияттан Матрена Егорова, Австрияттан Джулиана Слепцова, Лас-Вегастан Клим Федоров туристическай бөлөҕө, Санкт-Петербуртан Диана Павлова, Крымтан Постпредство Сэбиэтэ, Ялтаттан биир дойдулаахтарбыт уо.да а.бааллар.

Республикатааҕы тэрилтэлэр – Үөрэҕирии, Ыччат уонна соцкоммуникациялар, тас дойдутааҕы сибээстэһии уонна СР норуоттарын дьыалаларыгар Министерстволара, “Саха сирэ”, “Эдэр саас” хаһыаттар редакциялара, СР аудиовизуальнай нэһилиэстибэтин Национальнай Киинэ, Ем. Ярославскай аатынан государственнай музей, П.А. Ойуунускай аатынан литературнай музей, Хомус музейа уонна Киинэ, Музыка уонна фольклор музейа, “Сахафильм”, П.А. Ойуунускай аатынан Саха академическай театра, Д.К. Сивцев-Суорун Омоллоон аатынан опера уонна балет государственнай театра, Үүнэр көлүөнэ театра, Олоҥхо театра, Саха эстрадатын театра, Национальнай библиотека, Г.М. Кривошапко аатынан Государственнай филармония симфоническай хора, ресурснай-проектнай Киин, Республикатааҕы норуот айымньытын уонна социальнай-культурнай технология Киинэ, “Туймаада” вокальнай государственнай ансамбль, Аксинья уонна Наталья Посельскаялар ааттарынан балетнай оскуола, “Юные якутяне” ресурснай Киин, “Айыы кыһата” оскуола, республикатааҕы Аҕалар Сэбиэттэрэ, “Хомус кэрэ эйгэтэ” куруһуок, Майатааҕы народнай хор, Үһүс саас оскуолата (сал. А. Е. Ефремова), СВФУ студена Аскалон Семенов, Мэҥэ Хаҥаластан Диана Попова уо. да а. өрө көтөҕүллүүлээхтик кытыннылар.

Дьокуускай куораттан, Үөһээ Дьааҥы, Кэбээйи, Мэҥэ Хаҥалас, Нам, Сунтаар, Өлүөхүмэ, Үөһээ Бүлүү, Ньурба, Нерюнгри, Мииринэй, Ленскэй, Өймөкөөн, Булуҥ, Томпо оройуоннарыттан, Хатастан хастыы да коллективтар кытыннылар.

Бүлүүбүт улууһун Оройуоннааҕы Сэбиэтин депутаттара, улууска үлэлиир федеральнай уонна республикатааҕы тэрилтэлэр филиаллара, нэһилиэктэр, оройуон уонна Бүлүү куоратын үгүс тэрилтэлэрэ, общественнай түмсүүлэрэ, биирдиилээн олохтоохторо анаан-минээн кытыннылар уонна бу күннэргэ ыытыллыбыт бары тэрээһиннэр норуот таптыыр ырыатынан арыллан, түмүктэнэн өрө көтөҕүллүүлээхтик ыытыллан дьон-сэргэ сэҥээриитин, биһирэбилин ыллылар.

Бу кэрэхсэбиллээх акцияҕа кыттыы Сахабыт сирин Ил Дархана А.С. Николаев биллэрбит Патриотизм сылын кытта доҕуһуолласпыта тэрээһин ис хоһоонун байытан дьоммут-сэргэбит түмсүүлээх буоларыгар тирэх буолла.

Поэт Кындыл Уйбаан сирдээҕи олоҕор сүрэҕинэн, дууһатынан дириҥник таптаабыт Сахатын сирин, төрөөбүт күндү дойдутун, олоҥхотун кыраайын дьоно аалай кыһыл сарыалы долгуйа көрсө, хомус дьүрүһүйэр тыаһын суохтуу, ханна да сырыттар хотугу сулуһун долгуйа була, ыалдьар күнүгэр санаарҕыыр хатыҥар сүгүрүйэ, үөрэр күнүгэр чыычааҕа ыллыырын кэрэхсии, киирбэт күнүн түөһүгэр сүрэх курдук өрүү илдьэ сылдьарын тухары “Сахам сирэ барахсан” үйэ-саас ыллана, тарҕана, Ийэ дойдуга тапталы, махталы уруйдуу туруоҕа!

Надежда Иванова,

культура уонна норуот айымньытын сайдыытын

оройуоннааҕы Киинин салаатын салайааччыта,

Саха Республикатын культуратын үтүөлээх үлэһитэ