Күндү ааҕааччыларбыт! П.А.Ойуунускай аатынан литература түмэлэ төрүттэммитэ 50 сылын көрсө устуоруйатыттан таһаарыыны салҕыыбыт. Түмэл маҥнайгы сэбиэдиссэйэ В.А.Протодьяконов-Кулантай «Олох далааныгар» диэн 1992 с. кинигэтигэр маннык ахтан суруйбута: «1969 сыл мус устар 15 күнүгэр Саха сирин суруйааччыларын союһун бырабылыанньатын председателэ Семен Петрович Данилов ыҥыран ылан: “Платон Алексеевич Ойуунускай аатынан Литературнай музейы тэрийиэхтээхпит, бу үлэни ылын, директорынан аныыбыт. Дьиҥинэн эттэххэ, кырдьык, чэпчэкитэ суох үлэ, биһиги эйиэхэ эрэ эрэнэбит”, – диэтэ.
Мин буоллаҕына толкуй бөҕөҕө түстүм. Сааһырдым, сүүрэр-көтөр урукку курдук буолбатах, нус-хас чуумпура түһэр санаалаахпын. Ол гынан баран: “Ленинскэй гвардия байыаһа, саха биллиилээх революционера, государственнай деятелэ, саха советскай литературатын төрүттээччи П.А.Ойуунскай аатын бар дьоно истиҥник, дириҥник ытыктаан, сүрэҕэр-быарыгар иҥэрэ сылдьар. Кини үтүө аата-суола, күн-дьыл ааһан истэҕин аайы, эбиитин киэркэйэн, суолталанан иһэригэр ол толкуйдаммыт, былааннаммыт кини аатынан литературанай музей тэриллэрэ, сүһүөҕэр турара буоллар олус үчүгэй буолуо этэ. Платон Ойуунускай албан аатын сэргэ урут суруга-бичигэ суох саха уонна аҕыйах ахсааннаах хотугу норуоттар үүнэн-сайдан иһэр уус-уран литератураларын көрдөрүү, пропагандалааһын улахан иитэр-үөрэтэр суолталаах буолуо этэ” — диэн санаам баһыйбыта.” #сахалитературата#литература#музейисторията

 

Үгүс саха суруйааччылара таас дьиэ тутуутугар тус бэйэлэринэн кэлэн субуотунньуктууллара. Саха народнай поэта В.М.Новиков-Күннүк Уурастыырап. Түмэл пуондатыттан хаартыска.