Олунньу 13 күнүгэр Ийэ тыл, сурук-бичик декадатын чэрчитинэн П.А.Ойуунускай аатынан литературнай музейга төрөөбүт тылбытын төлкөлүүр, ийэ тылбытын илгэлиир үтүө тэрээһин буолан ааста. Бу күн бастакы аҥарыгар сурук-бичик күнүнэн икки кэрэхсэбиллээх быыстапкалар турдулар. Бастакыта, “Латыын алпаабытынан тахсыбыт үөрэх маҥнайгы кинигэлэрэ” 1897 сылтан 40-с сылларга диэри букубаардар турдулар. Бу саха тылын үөрэтии, сахалыы алпаабыт хайдах сайдан испитин көрдөрөр. Иккиһинэн, “Билии, үөрэх – олох төрдө”, манна кинигэ тутуурдаах араас статуэткалар, сувенирдар, открыткалар, значоктар, 200-кэ кырачаан араас тастаах, темалардаах кинигэлэр уонна киһи сөҕүөх дьиктилээх уруучукалар турдулар.

Бу күн иккис аҥарыгар саха былыргы суругун-бичигин туһунан музей сырдатар салаатын сэбиэдиссэйэ, суруйааччы, П.А. Ойуунускай аатынан судаарыстыбаннай бириэмийэ лауреата Н.Е.Винокуров-Урсун, саха тылын инники сайдыытын туһунан ХИФУ саха салаатын 2 кууруһун устудьуона Игорь Данилов. Мустубут дьоҥҥо иһитиннэрии оҥордулар. Ол кэнниттэн ноҕуруодап алпаабытынан дьыктаан суруйуута буолла. Манна барыта 20-ттэн тахса киһи кытынна. Үс киһи сыыһата суох Ноев Степан (ЯГНГ саха тылын литературатын учуутала), Лидия Манчурина (дассыан, ХИФУ), Иннокентий Петров (Саха гимназиятын алын сүһүөх учуутала) уонна алта киһи биирдии, иккилии сыыһалаах суруйдулар. Бу кыттыбыт дьонтон үгүстэрэ бу алпаабытынан маҥнайгы суруйуулара буолан олус сэҥээрдилэр, эһиил өссө бэлэмнээх кэлиэх буоллулар. Ити кэннэ музей научнай сотруднига Ефросинья Ноговицына саха былыргы алпаабытын туһунан интэриэһинэй көрдөрүүлээх быыстапкалаах кэпсээтэ. Ол курдук сурук-бичик күнүнэн манна мустубут дьон бэйэлэрин иитиллибит ийэ тылларын былыргытын, уруккутун, инники сайдыытын туһунан истэн эрэ буолбакка дьиҥнээхтик харахтарынан көрөн, сорохторо илиилэригэр тутан астынан, кэрэхсээн бардылар.

Халгаева Нюргуяна Викторовна