«Саха сирин суруйааччылара» Ассоциация, П.А. Ойуунускай аатынан литература түмэлэ «Мимуоза» уран дьүһүлгэн салон иккис тэрээһинин ыыттылар. Бу тэрээһин хас да түһүмэхтэртэн турар. «Холуста кистэлэҥэ» хартыына туһунан түһүмэххэ «Полярная звезда» сурунаал сүрүн эрэдээктэрэ Владислав Доллонов Иннокентий Пестряков уруһуйугар кинини уонна Софрон Осиповы уруһуйдаабытын кэпсээтэ. Альберт Афанасьевич Гоголев-Гринпис «Томпо үрэх таабырына» кинигэтэ «Көмүөл» кинигэ кыһатыгар тахсыбытын иһитиннэрдэ. Владислав Семенович түмэлгэ ювелир, биллиилээх муосчут Алексей Андреев сэлии, тайах муоһуттан, удьурҕайтан оҥорбут уруучука уурар сыаналаах бэлэҕин туттарда. С.В. Гольдерова-Саргы Куо хоһооннорун рукопиһын бэлэхтээтэ. Ырыаһыт Юрий Гольдеров «Ардахха санаа” диэн кини тылларыгар ырыатын анаата. “Үйэлээх айымньы” түһүмэххэ олоҥхо тыйаатырын артыыстара Егор Егоров, Дмитрий Хоютанов ыалдьыттаатылар,  «Олоҥхо түүлэ” испэктээхтэн быһа тардан көрдөрдүлэр. Диктор уонна артыыс  Бэчигэн Ньургун литература сонуннарын аахта. Салон хас биирдии ыалдьыта көрөөччүлэр ыйытыыларыгар аһаҕас кэпсэтиигэ кыттан сэргэхтик ааста. Литература түмэлэ кэлбит дьону тоҥ отонунан күндүлүүллэрэ үтүө үгэскэ кубулуйда. Былатыан Ойуунускайдаах ыалдьыттарын маннык күндүлүүллэрэ. Ефросиния Ноговицына «Биир мал сэһэнэ” диэн түмэл сыаналаах эспэнээттэрин туһунан кэпсээтэ. “Мимоза” альбом-кинигэҕэ айар куттаах дьон хоһооннорун суруйан хааллардылар. Ити курдук инникитин да, литератураҕа холонооччулар суруйааччы кириитикэтин истэр санаалаахтара көһүннэ.

Онуоха бэйиэт Саргылаана Гольдерова-Саргы Куо санаатын маннык үллэһиннэ:

   М и м у о з а  т ыл л ы ыт а

Сайаҕас салгынтан

Сандаарбыт саатыган,

Алаарбыт-тэтэрбит,

Аалай-тунаар түспүт,

Көҕөрбүт-наҕарбыт

Күндү сэбирдэхтээх,

Мичиҥниир сарбынньах

Мимуоза барахсан –

Кэхтэри билбэккэ,

Кэрэ кэскиллэнэн

Үтүө дойдуга

Үүнэн турдаҕыҥ…

 

Ити курдук улуу Ойуунускай атырдьах ыйын 20 күнүгэр 1923 c. Мимуоза хоһоонун суруйбут.Бу инньинэ Муора – диэн айымньыта Ялтаҕа от ыйын 14 күнүгэр айыллыбыт буоллаҕына, Мимуоза сибэккини ол кэмҥэ Кырыымҥа сылдьан сэҥээрэ көрөн хоһоон оҥорон хоһуйдаҕа буолуо диэн сабаҕалыахха сөп.

Ийэ сирбит мичиҥниир сарбынньахтаах Мимуоза сибэккитин кэрэхсии одуулаан, уйаҕас иэйиитигэр суулаан, хомоҕой хоһоон оҥорон Былатыан Ойуунускай хоһуйбут айымньыта cүүс сыл ааспытын кэннэ айыы тыыны сатыылатар уран тыл дьүһүлгэнэ буолан эйгэ ситимигэр киирбитэ дьикти!

Быйылгы сылга П.А.Ойуунускай аатынан литература түмэлэ тэриллибитэ 50 сылын көрсө сэргэхтик, сонуннук үлэтин саҕалаабыт “Мимуоза” уран дьүһүлгэн салон иккис киэһэтигэр ыҥырыллан тиийэн саҥа хоһооммун аахтым.Бу бырайыак автора Маргарита Иванова – Дайар Суһум салонугар ыалдьыттата ыҥырарыгар “Cаҥа хоһоон” диэн түһүмэххэ хайдах кыттарбын быһааран биэрбитэ. Ааҕыахтаах хоһоонум ханна да бэчээттэнэ,ааҕылла илик саҥа айымньы буолуохтаах.Ону илиибинэн суруйан аҕалан, дьон-сэргэ инньигэр доргуччу ааҕан, сүрэхтээн баран, рукописьпын Ойуунускай түмэлигэр бэлэхтиибин.Онон Индияҕа айаммыттан айыллан тахсыбыт,ханна да өссө бэчээттэнэ илик “Гималай хайаларыгар” айымньым “Мимуозаҕа” cүрэхтэммитигэр барҕа махтал буолуохтун.

Саҥа айымньым рукопиһын түмэлгэ бэлэхтээри салон ыалдьыта буолан олорон, «Литература сонуннара”, «Биир мал сэһэнэ”, ”Талаһа кэбиһэн”, ”Хоһоонтон тыллыбыт ырыалар” о.да атын түһүмэхтэртэн элбэҕи да кэрэхсии иһиттим, билбэтэхпин да биллим. «Cэргэх кэпсээҥҥэ” «Көмүөл» кинигэ кыһатын дириэктэрэ, суруналыыс, суруйааччы Борис Павлов издательствотыгар сабыс-саҥа тахсыбыт “Томпо үрэх таабырына” кинигэни суруйбут, анаан-минээн Кириэс Халдьаайыттан тиийэн кэлбит Альберт Гринпиһи кытта билсиһиннэрдэ. Аан бастакы кинигэтэ, аан бастаан литературнай киэһэҕэ кыттыыта буолан сүрдээҕин долгуйан, бу саҥа төрөөбүт кинигэм миэхэҕэ төрөппүт оҕом кэриэтэ күндү буолар диэн ааптар билиннэ.

Түмэл иһинэн төрүттэммит уран дьүһүлгэн автора Маргарита Иванова –Дайар Суһум өр сылларга Таатта тэлэбиидэнньэтигэр дириэктэринэн үлэлээбитэ, «Араҥас Сулус» улуустааҕы литературнай түмсүүнү айымньылаахтык салайбыта. Онон П.А.Ойуунускай төрөөбүт дойдутуттан уһуйуллан, буһан-хатан тахсыбыт, айар үлэ алгыстаах түһүлгэлэрин төрүттэһэ сылдьар кэм күөсчүтэ буолар. “Cаха” көрдөрөр-иһитиннэрэр хампаанньа иһинэн дьон-сэргэ сэҥээриитин ылбыт Сахабыт сирин улуустарын барытын хабан сырдаппыт “Дойдум барахсан” биэриилэрин умнубаппыт. Кини ”Хоһоон суһума” Саха Академическай тыйаатырыгар ыытыллыбыт өрөспүүбүлүкэтээҕи поэтическай күрэҕэр хаһан эрэ эмиэ кыттыбыт дьоллоохпун.

«Боотур “эр киһи кутун-сүрүн үрдэтэргэ туһуламмыт сурунаалга кыл. редактордаабыт, «Cүбэһит» сурунаал-хаһыаты үлэлэппит сыллара о.д.а. атын бырайыактара Маргарита Иванова-Дайар Суһум ахсаабат айар эйгэлээх, дэгиттэр талааннаах,  суруналыыс, суруйааччы, тэрийээччи, туруу үлэһит киһи буоларын кэрэһэлииллэр.

Онон “Саха сирин суруйааччылара” Ассоциация, П.А. Ойуунускай аатынан литература түмэлин кытары ситимнээх үлэттэн үөскээн-төрөөн тахсыбыт “Мимуоза” уран дьүһүлгэн тула, ускуустубаны, литератураны, кэрэ эйгэтин сэҥээрэр  дьон-сэргэ куруутун тоҕуоруһа турдун! Улуу Ойуунускай уран тылынан уйадыйа хоһуйбут Мимуозата саҥаттан саҥалыы тыллан, сахалыы да саҥарар саҥнаахха сайдам иэйиилэри саҕа турдун! Тускуо!