Кыайыыга аналлаах ырыалар

Бүлүү куоартыттан мелодист Владимир Васильевич Васильев музейбыт акциятыгар кыттыһан, Тимофей Сметанин тылларыгар «Саллаат сүрэҕэ», Леонид Попов тылларыгар «Саллаат турар» айбыт ырыаларын ыытта. Ону истэргитигэр ыҥырабыт.

Саха Республикатын үтүөлээх үлэһитэ, СР бочуоттаах бэтэрээнэ, самодеятельнай композитор Владимир Васильев аан бастаан ырыа айар туонатыгар Семен Руфов «Биллибэт саллаат уҥуоҕар» ырыатынан киирбитэ. Ити кэннэ сэрии тематыгар 30-тан тахса ырыаны суруйда. Ол ырыалартан ордук буойун поэттар Иннокентий Эртюков тылыгар «19-с хайыһар биригээдэтэ», Тимофей Сметанин «Саллаат сүрэҕэ», хуорга анаан Петр Тобуруокап хоһоонугар суруйбут «Ким да умнуллубат, туох да умнуллубат» киэҥник биллэллэр. Кини култуура үлэһитин идэтин ылыаҕыттан, хуордары тэрийэн үлэлэтэр. Ордук Халбаакы оскуолатыгар үлэлии сылдьан, 50-ча киһилээх хора ситиһиилээхтик үлэлээн 1992 с. народнай коллектив аатын ылары ситиспитэ. Бүлүүтээҕи Н.Г. Чернышевскай аатынан педколледжка 1995 – 2009 сс. үлэлиир кэмигэр саха салаатын 80–90-ча студеннаах хуорун ситиһиилээхтик ыллаппыта. Тустаах үлэтин таһынан 1996 с. «Алгыс» сынньалаҥ киинигэр тэрийбит хуора эмиэ народнай коллектив аатын ылан билигин да ситиһиилээхтик үлэлиир. 2010 сылтан саастаах дьоҥҥо тэрийбит хуора бу сыллар усталарыгар 5 бырайыагынан үлэлээн көрөөччүлэр, нэһилиэнньэ махталын ылаллар. Олортон 2018 с. Москваҕа Сергиев Посадка буолбут Бүтүн Россиятааҕы пенсионардар хуордарын куонкурустарыгар үрдүк ситиһиилээхтик кыттыбыттарын, «Память в сердце храня» проектарынан Ильмень күөлгэ охтубут саха саллааттарыгар аналлаах тэрээһиннэрин ааттаталыахха сөп. Быйыл олунньу 15 к. Улуу Кыайыы 75 сылыгар анаан, хуор тэриллибитэ 10 сылынан «Саадаҕы курданар сылларга» программа эмиэ бэрт сэргэхтик ыытыллан дьон сүргэтин көтөхпүтэ, Улуу Кыайыы хайдахтаах сыранан кэлбитин санаппыта.