Кэкэрдэ — Зоя Никандровна Данилова,

Медицина киинэ аһыллыаҕыттан статистигынан үлэлиир. Кини хайдах хоһоон суруйар буолбутун туһунан маннык эппитэ:

«Оҕо эрдэхпинэ сахалыы, нууччалыы

кистээн  хоһоон суруйарым, кэлин  бириэмэ суоҕа үлэ, түбүк ыгара.

Сааһыран  икки аҥаар сыл буолла нууччалыы хоһуйан  барбытым.  Хоһоонньуттар түмсүүлэригэр киллэрбиттэрин кэннэ икки сыл  сахалыы суруйабын.

Сахалыы  тыынан көхсүм кэҥээтэ, утахпын ханнарабын.

Алгыстаах эриэккэс ийэ тылбынан,

Хоммут уоспун хоҥнорон,

Алтан чуораан тылбынан алҕанным!

Өрөөбүт уоспун өһүлэн, аны

ырыа тылларын

сэргэ, сүрэхпиттэн өһүллэн бэл матыыптанан,  үрүйэ уутунуу үтүллэн түһэннэр,

хас да ылбаҕай ырыалары бэйэм ыллаан, куйаарга көтүтэн

саҥа түспүт хаардыы налыччы салалыннылар!

Төрүт Сахабыт  Төлкөлөөх тылын Төлкөлөөх ырыанан сүрэхтэргэ түһэриэм диэн баҕарабын!». Салгыы бу хамсык кэмигэр суруйбут хоһооннорун таһаарабыт. Бар дьоммут, чэгиэн буолуҥ!

 

Сиргэ ыарыы салгына

 

Эмискэ сир үрдүнэн ыарыы салгына,

Элбэх да дьылҕаны мэҥиэстэн аччатта,

Эҕирийэн кэбистэ да, сир хапсыйда,

Эйэҥэлээн ылардыы күөдэл сахсыйда!

 

Эмпэрэттэн аллараа төкүнүйүөхчэ,

Эллэр эбэҕэ дириҥҥэ тимириэхчэ,

Эмсэҕэлээтэ аан дойду уйулҕата,

Эйэлээх чуумпу олоҕо уйадыйда!

 

Халлаан киэҥ ньуурун тыыра көтүөхчэ,

Хара буордаах сиринэн тилигириэхчэ,

Элэйбэккэ, сылайбакка дьону быыһаан,

Эмчиттэр туруннулар ыарыыны кыйдаан!

 

Халлан аастар күн тыгыа, үрүйэ сүүрүө,

Хонууга, алааска ардаан, кири сууйуо,

Экчэйбит сирбит үтүөрэн силигилиэ,

Эриэккэс кэрэ сибэккиилээн тэнийиэ!

 

Кэкэрдэ

12.05.2020с

Харантыын

Хара тыыннаах куттал суоһаата,

Хатаннык дьулааннаах сонуҥҥа.

Хараҥарда дойду барыта,

Хоруоналаах ыарыы дьаһайда!

 

Хаҕыстык үлэбин тохтотон,

Харантыыҥҥа дьиэҕэ олордум.

Хата дьэ баҕабын толорон,

Хадаҕа буолбуту оҥордум!

 

Харыстаан баһылык көрдөһөр,

Хадаар бэрээдэги толорбот,

Халыйар сыстыган тохтообот,

Хабыалаан ыарыыбыт көрүлүүр!

 

Хабыллан ыалдьыбыт өйдөнөр,

Хабахха тыыннарар сөтөллөр.

Хас биирдии ыарыһах ол соро,

Хаарыллаат үтүөрбүт ол дьоло!

 

Хатанан бүгэбин мин дьиэбэр,

Халлааным көстүбэт тиэргэммэр.

Харалдьык тыллан сыта аастаҕа,

Харыан ньургуһунум хаттаҕа!

 

Халбарый дуу, бу үрүҥ күнтэн,

Халтарый дуу, бу үтүө сиртэн,

Хабырыттан дьылҕаны быһыма,

Хаарыан сири хагдарытыма!

 

Кэкэрдэ

  1. 05. 2020с