“..отто дойдуга төрөөн  олорбут олоҕум уһуна…”

Ааспыт алдьархайдаах сэрии таарыйбатах ыала суох буолуохтаах. Уус Алдан улууһун уһук кырыы Түүлээх нэһилиэгэр олохтоох Громовтар аймахтан ини-бии Баһылайдаах Арамаан төрөппүт уолаттара Өлөксөй, Хабырыыс, Хонооһой сэрии бастакы сылларыгар ыҥырыллан, уот сэрии саамай хаан тохтуулаах ыарахан кыргыһыыларыгар Арамаан Өлөксөйө олоҕун толук уурбута, Баһылай уолаттара чэгиэн эттэрин сэймэктэтэн кэлэн, эрдэ олохтон барбыттара.

Громов Алексей Романович 1918 сыллаахха бэс ыйын 21 күнүгэр Кылаайыга Арҕаа Төбөҕө төрөөбүтэ. Уҥуоҕунан улахан, орто этиргэн, үрдүк кырыылаах муруннаах, киэҥ  харахтаах, ыгдаччы соҕус сарыннаах, бытааннык саҥарар майгылаах хара киһи. Түүлээх биэс кылаастаах оскуолатын бүтэрээт, колхоһугар биригэдьиирдээбитэ. Партиялаах. Дойдутуттан барыан иннинэ икки сыл колхоһугар председателлээбитэ. 1940 сыллаахха Саха АССР Совнаркомун иһинэн советскай тутуу курсун Дьокуускай куоракка үөрэнэн бүтэрбитэ. 1940 сыл тохсунньу 29 күнүттэн оройуон советын исполкомун быһаарыытынан, тутуу оройуоннааҕы отделыгар инструктордаабыта. 1941 сыллаахха тохсунньу 25 күнүгэр «Чкалов» колхозка Өнөр нэһилиэгэр председателинэн быыбардаммыта.

1941 сыллаахха атырдьах ыйын 15 күнүгэр сэриигэ тылланан барбыта. Мальтаҕа сборга сылдьыбыта. Маҥнайгы сэриигэ киириитэ 1942 сыл кулун тутар 9 күнэ. К.К. Рокоссовскай командующайдаах Соҕуруулуу-Арҕааҥҥы фронт 16‑с армиятын 97‑с сд., 69‑с сп. 2‑с мииннэй ротатыгар сылдьан, Смоленскай уобалас Кулино, Сорочка нэһилиэнньэлээх пууннары босхолооһуҥҥа, Москва анныттан гитлеровецтары арҕаа үүрүүгэ кыттыбыта. 1942 сыл от ыйын 27 күнүгэр дивизия командирын бирикээһинэн киниэхэ младшай сержант званиета иҥэриллибитэ. 1942 сыллаахха балаҕан ыйын 23 күнүттэн 97-с сд. 233‑с сп. 1‑гы стрелковай батальонун 1‑гы отделениетын командира буолбут.

Кини 1943 сыллаахха олунньу 22 күнүгэр хорсуннар өлүүлэринэн сэриигэ өлбүтэ уонна Смоленскай уобалас Думиническай оройуонун Коммуна Большевик бөһүөлэгэр көмүллүбүт.

Бу күннэргэ Өнөр орто оскуолатын саха тылын уонна литературатын учуутала Альбина Николаевна Громова Кыайыы 75 сылын көрсө “Громов Алексей Романович “..отто дойдуга төрөөн олорбут олоҕум уһуна…” диэн буойун аймаҕын кинигэтин хомуйан таһаарда. «Бу кинигэҕэ буойун олоҕун, үлэтин туһунан суруйуулар, бэйэтэ суруйан хаалларбыт хоһоонноро, төрөппүттэригэр үөрэнэ сылдьан, сэрии уоттаах толоонуттан суруйбут суруктара түмүллэн киирдилэр. Алексей Громов хоһоонноро латыын алпаабытынан суруллубут, суруктара ханна да бэчээттэммэтэх, дьон билиитигэр тахсыбакка балтыларыгар хараллан сыппыт. Суруктары таһынан Өлөксөй оскуолатааҕы сылларын туһунан ахтыыта, хоһооннорун суруммут тэтэрээтэ, тус докумуоннара – бу барыта кини кылгас эрээри чаҕылхай олоҕун туоһута буолан, биһиэхэ элбэҕи кэпсииллэр.

Суруктар элбэхтик ааҕыллан, кэм-кэрдии да ылан, кумааҕылара кэбирээбиттэр, көстүүтэ мөлтөөбүт, сорох сирин киһи сэрэйэн эрэ ааҕар буолбут. Онон аны аҕыйах сылынан олох да ааҕыллыбат дьылҕаланыах курдуктарыттан сылтаан, бу кинигэни таһаартаран, үйэтитэр туһунан санаа киирбитэ. Суруктар хайдах баарынан, улахан көннөрүүтэ суох киирдилэр, арай кыайан ааҕыллыбатах өттүн сэрэйэн эбэн биэрдибит. Суруллубут – суоруллубат…», — диэн Альбина Громова кинигэтигэр суруйар.

Охлопков А. Н. «Кэччэгэй баай кэпсээнэ» диэн чабырҕаҕын 1940 с. ыам ыйын 12 күнүгэр Бээрийэ диэн сиргэ сирэй бэйэтиттэн уһулан ылылынна. Ааҕааччы тугу эппитинэн манна сурулунна. Уһуллум Громов Алексей Романович. Ол чабырҕаҕа «А.Е. Кулаковский, т. 2. Рукописные варианты основных текстов, списки, неопубликованные произведения и dubia)»  диэн 2018 с. Новосибирскай куоракка Наука издательствотыгар тахсыбыт кинигэ5э 242–248 страницаларга киирбит. Өссө 1935 сыллаахха П. А. Ойуунускай төрүттээбит Историяны, литератураны, тылы үөрэтэр институт бастакы сүрүн үлэтинэн фольклор пааматынньыктарын хомуйуу буолбута. Бу улахан хамсааһыҥҥа Алексей Романович эмиэ кыттыспыт эбит.

Алексей Громов туһунан өссө биир күндү өйдөбүнньүк – аллараттан үөһэ арыллар, сорох лиистэрэ туллан эрэр эргэ блокнот буолар. Манна кини 18 сааһыттан саҕалаан суруйбут хоһоонноро бааллар. Сороҕун чэрэниилэнэн, сороҕун боростуой харандааһынан латыын алпаабытынан суруйбут. Аллараа өттүгэр күнүн-ыйын туруорар, сирин ыйар эбит. Бу сылларга «Кыылаайыкап» диэн суруйар аат ылына сылдьыбыт. Оччотооҕу хаһыаттарга, баҕар, бэчээттэммит буолуон сөп. Хоһооннор, оччотооҕу олох сиэринэн, саҥа олоҕу уруйдуур ис хоһоонноохтор, Аан дойдуга буола турар быһыыны-майгыны балачча билэр, кэтээн көрөр эдэр киһи хараҕынан айыллыбыттар. Төрөөбүт дойдуну хоһуйууга эмиэ холоммут. Хоһоон айыллар ньыматын балачча баһылаабыт, дорҕоон дьүөрэлэһиитин, рифманы даҕаны кыайа туттар эбит.

 

***

Сылаастан сылааска

Сыламнаан сытабыт,

Сыраллаах сааска

Сынньанан ылабыт.

Кэрэлээх кэмнэрбэр,

Көрүлүүр күннэрбэр

Кэнчээри кэскиллэр

Кэл … күннэрбэр

Билиҥҥи дьоллорбун

Бэлиэтээн этэрбин

Томтойор тускулбун

Туойаммын ыллыыбын.

Үтүөттэн түспэккэ,

Өлбөккө-сүппэккэ

Сылларбын болдьооммун

…… … … … … … …

***

Төлөннөөх уоттары

Төбөтүн көрдөрбүөн,

Тыыннаах тыллары

Тырымын сөхтөрбүөн.

Өлөксөй оҕото Былатыан

Өйдөөхтөн өйдөөҕүн

Өлөртөн өлбөтүн

Эппитэ кырдьыгыан…

Кинилэр – генийдэр…

Кирбииттэн кирбиини,

Кинилэр – чэгиэннэр…

Кэлэртэн кэлиини

Бэлиэтин билэннэр,

Политик киинигэр

Уһатан биилээннэр

Олоҕу билбиттэр.

***

Салаҥ кэрэ дьүһүнэ

Санааларгын туппута,

Үтүө быһыы, мөссүөнэ

Өйгүн сүүйэн, кыайбыта.

Кэлин тиһэх киирэргэ

Кэмчи буолар санааккаҥ,

Кэдэһийэн кэлэргэ

Киэргэл буолла таһааккаҥ.

***

Кыһыл төлөн Өктөөп уота

Кыыма өрө ыһыллан,

Кытыаһынна бары дойду номоҕо

Кыыһар суола аһыллан.

Туойдарбыан

Сайынын быһыттан ууллар

Бараммат саккырыыр сүүрүктээх,

Кыһынын кыттыһан чэчириир

Кыдьымах быллараат иэннээх.

Аатырбыт Алланы болҕойон

Ахсаабат киэлитин хоһуйан,

Номохтоох тыллары булларбыан,

Нарылаан-ойуулаан туойдарбыан!

Күрүлүү-күрүлүү күпсүйэр,

Дьиримнии-дьиримнии эргийэр,

Эримиэн, көлүөһэ дьэргэйэн

Сүр күүстээх массыына барахсан

Сиэмэни сууххайдык араарар.

Ситиилээх-кимиэллээх үлэтин,

Сирдиргэс охсуулаах кыайыытын

Сирийэн-ырытан туойдарбыан!

Аныгы олохтоох артыалбыт

Ахсаана элбээбит сүөһүлээх,

Тупсубут тииппэбэй хотоммут

Таптанар сүөһүтэ көрүүлээх.

Түүлэриҥ -өҥнөрүҥ  тупсарар

Туйгуннаах-талааннаах дьонноруҥ

Түбүктээх үлэлээн таһаарар

Тутуутун толорон туойдарбыан!

Тиҥийэр-таҥыйар болоттон,

Тоҥсуйар-тобуйар дорҕоонтон

Томтойо-дьэргэйэ сайдыбыт

Түмсүбүт-мустубут кырдалбыт.

Саҥалыы үлэтэ дьэргэйбит,

Саҥарар сибээһэ дьэндэйбит.

Чынайа кырдала килбиэниэн,

Кыттыгас тылбынан эттэрбиэн!..

Үөрэнэр күрэҕэ үрдээбит,

Үгүстэр үөрэнэ мустубут,

Сэбиэскэй оскуолам кэҥээбит,

Саргылаах санааҕа моһуйбут..,

Үөрэҕин үтүөтүн ыларга

Өрөгөй өйдөрү үрдэтэн,

Билиинэн-көрүүнэн сайдарга

Баҕабын туойаммын эттэрбиэн!

Саһарбыт-наҕарбыт талахтаах,

Субурҕа синньигэс күөллэрдээх,

Оллумаат-боллумаат дулҕалаах

Очумаас-чочумаас сирдэрдээх,

Төрөөбүт дойдукам дьоллорун

Талааннаах тыллары кыайдарбыан,

Түллүбүт күүстэрин туойдарбыан!

1936 с. Х ыйа «Кылаайы»

Аныыбын дьоллорбун

Төлөннөөх уохтаах

Төрөөбүт дойдум,

Сандаарбыт сырдыктаах

Сыралыйбыт олоҕум,

Томтойдор томтойон

Торолуйан эрэҕин!

Өрүтэ дьондойон

Үрдээҥҥин үүнэҕин!

Сир ийэ үрдүгэр

Сирилии тыынаҕын,

Сибиэттэн бииригэр

Сэтэрэн кыыһаҕын!

Төрөөбүт дойдубун,

Таптыыбын эйиигин!

Аныыбын дьоллорбун

Алыптаах эппиниин!

***

Хаанымсах дьикээрдэр –

Утамсах чиччиктэр!..

Сэбиэскэй Сойууһу

Сэриилээн моһуогу

Тэнитэн көрдүнэр!

Тиэритэ уураммыт

Тэтими көрдүнэр!

Тобулан туттуохпут.

Сэймэктээн ыытыахпыт,

Сирбитин биэрбэппит,

Кыйдыахпыт, кыайыахпыт

Кыайыынан чиҥиэхпит!

Төрөөбүт дойдубун,

Таптыыбын, эйиигин!

Аныыбын дьоллорбун

Алыптаах эппиниин!

«Кылаайыкап» 1937 с., ыам ыйа

Силлиэ-хахсаат

Түүнүн быспат, күнүн көппөт,

Тохтоон турбат силлиэ түстэ,

Сылаас салгын сырамын сэгиппэт

Сытыы кыыдаан тыына күүрдэ.

Арҕаа аргыар аана аһыллан

Ааттаах хахсаат төлүтэ тэбиннэ,

Илин эҥээр хаспаҕа хаһыллан

Илгэ бэйэтэ имири имилиннэ.

Кыыдаан кыһын кылыһыйан таҕыста,

Кыһыыра-кыскыйа кылана турда,

Силлиэ буолан сиксиэр сахсыйда,

Сирилээн ситэн туонун туойда.

Күммүт уота күүтэн турбат,

Көрбүт бэйэтэ быһа сүппэт,

Дойду ньуура кубулуйан долгуйбат,

Дуолун ыһыктан суолун сүтэрбэт.

1938 сыл. Сэтинньи. Мүрү

 

Харах уута суох кыайан ааҕыллыбат бу үс муннуктаах суруктары биир-биир сэрэнэн арыйыаҕыҥ…

1941 сыл

«Дьонум Громовтор дорооболоруҥ!

Сылдьыым, здоровьем үчүгэй. Районтан 12/VIII турбуппут уонна куоракка 15/VIII кэлбиппит. Сассыарда кэлэн баран киэһээ барбыппыт. Ханна да сылдьыбатым. Баанньыкка сууннарбыттара, остоловкаҕа аһаппыттара. Дойдум дьонуттан Фоманы көрсүбүтүм. Оттон эдьиийбэр адьас чугаһаан баран сылдьыбатым.

Якутскайтан 16/VIII туран баран Иркутскай область Усолье диэн куорат таһыгар 8/IX-гэр кэлбиппит уонна военнай лагерга үөрэнэн эрэбит. Барыта Якутскай куораттан 270 көһү, оттон дойдубуттан 300 көһү айаннаан кэллибит.

Үөрэхпит төһө да бириэмэҕэ буолара биллибэт. Үөрэх кытаанах. Кыһын олорор семилянка дьиэни оҥоробут, он­но буор хаһабыт. Условие бэрдэ суох.

Төһөҕө да үөрэнэн ханна да барарбыт биллибэт. Биһиги курдук үөрэнээччи элбэх. Прокофий Оллонов, Бережнов Алеша атын чааска эмиэ үөрэнэллэр. Мин Түүлээхтэн соҕотохпун. Атын колхозтаахтар ханна да баалларын билбэппин.

Саҥа военнай таҥаһы (аминдированияны) биэрбиттэрэ. Эргэ бэйэбит таҥаспытын складка уурдубут.

Ону баҕар дойдубутугар ыытыахтара. Мин соммор суулаан баран кэлгийбитим. Сотторум адьас инчэҕэй этэ онон сытыйан да хаалыан сөп уонна таҥаһым олус киртийбитэ.

Палаткаҕа олоробут онон тымныыта да олус.

Оллонов Прокопийдааҕы 27/IX-гэр фабрикаҕа үлэҕэ ыып­пыттар. Ханна да барбыттара биллибэт.

Дьэ эһиги хайтах олороргутун хайаан да биллэриҥ. Копырин Василийга суруттарын уонна бу сурукпун аахтарыҥ. Миигиттэн Приветтэ туттун.

Оҕолор хайтах сылдьаллар?

Мин адырыһым

Иркутский область, Восточное-Сибирское Железно-Дорожная станция Мальта

Почтовай ящик № 128

Аҕам хаччы көстөр буоллаҕына 50‑100 солк диэри үптэ пүрүбүөттэ ыыт райоҥҥа киирэр итэҕэл киһинэн.

Баҕар телеграмма биэриэм. Ол тиийдэҕинэ телеграммата биллэриҥ. Манан суруйар бүттэ.

Суруйар соло суох буолан хас да күн бу суруйдум.

Атын сиргэ бардахпына биллэриэм.

Суруйдум Громов Алексей Ром.

28/IX–41 год».

«Дьонум Аҕам Роман ийэм Мария уонна балыстарым
Мария Анна буолан миигиттэн приветтэ тутуҥ!

Мин сылдьыым олус үчүгэй, ыалдьыбаппын. Кулун тутар ый 9 күнүттэн ыла фроҥҥа сылдьабын.

Билигитэ арани эҥин буола иликпин. Минометнай батальионҥа минометчигинэн сылдьабын. Өстөөхтөрү наар мии­нэнэн ытыалыыбыт 1–3 км. сиртэн.

Билигин Смоленскай обласка Брянскай куорат чугаһыгар сытабыт. Наступление буола илик онон сэриилэспэккэ олоробут.

Немецтэр үрэх уҥаргытыгар дэриэбинэлэргэ олороллор. Биһигини миинэнэн, пулеметинэн ыталлар. Өлүү, арани буолуу баар. Күн бээһэ мин табаарыһым аттыбар сылдьан миинэттэн өллө. Онон сүрдээх кутталлаах уонна сэрэхтээх.

Сахаттан үһүөбүт эрэ, Усть-Алдантан Бурнашев Петка оҕото Бурнашев Гавриллыын иккиэбит. Кини үчүгэйдик этэҥҥэ сылдьар.

Уонна атын кими да өтөрүнэн көссө, билэ иликпит.

Дьэ эһиги хайтах олороҕут, бэйэҕит доруобуйаҕыт хайтаҕый. Бары ыаллар олоруулара хайтаҕый. Үлэ хамнас хайтах барар, төһө кыһалҕанан кыстаатыгыт?

Мин эһиэхэ боруонтан урут биирдэ суруйбутум (аҕыйах хонуктааҕыта) ол тиийдэ дуо? Бу эмиэ иккиһин суруйдум.

Сэрии өтөр бүтэрэ биллибэт. Тов.Сталин прикаһынан 1942 сыл бүтүөхтээх. Онон билигин да хас да ый хонугар сэрии тиийэр. Онтон тыыннаах ордон хааллахха дойдуну булуллар буолла…

Биһиэхэ уһун сынньаланы биэриэхтээх этилэр… онно баҕар Сибиргэ ытыахтара.

Бу дойду тымныыта, тыала бэрт буолан билигин да сүрдээх. Үчүгэй күн диэн бэрт ахсааннаах, куруук тыал, ардах-хаар түһэ турар.

Дьэ үгүһү тугу мээнэ суруйуомунуй? Эһиги бэйэҕит миигиннээҕэр ордук сонуну истэ-билэ олордоххут. Биһиги тугу да олох истибэппит.

Арай куруук хаһан өлүллэр диэн ол санаата уонна дойдуну, урут кылгас оҕо сааска хайтах сылдьыбыты хас сылынан ааҕан саныы сылдьабыт.

Мин сүүрбэ түөрт сааспын туоларым 45 хонук хаалла. Ити бу отто дойдуга төрөөн олорбут олоҕум уһуна.

Олох эрэйин, кытаанаҕын, уол оҕо төрөөн биллим дөксө, билиэм иннибэр турар.

Өскөтүн сэрииттэн тыыннаах оттохпуна, иккиһин тө­рүүбүн. Иккиһин саҥалыы кырдьа барар олохпун олоруом этэ.

Дьэ эһиги үчүгэйдик олоруҥ!.. Миигин олус ахтымаҥ! Икки кыыскыт этэҥҥэ сырыттахтарына эһигитини иитиэхтэрэ. Кинилэри миигин ииппиккит курдук, дөксө ордуктук өйдөөх-санаалаах гына иитиҥ!

Мин эһиги хайтах олорор сураххытын хаһан кэлиэхпиттэн ыла истибэтэхпиттэн олус хомойобун.

Онтон мин сурахпын эһиги истэр, суруктарбыттан биири эмэ туппут буоллаххытына ол үчүгэй.

Мин табаарыстарбар, куруук саныыр күндү доҕотторбор, Копырин Василийга (бырааттарынаан) Сыроватский Савваҕа, Бережнов Гаврилга, Михаилга, Алексеев Прокопийга (оҕолорунаан) Попов Василий Кон., Бочкарев Константин Петровичка уонна Винокуров Дм.Дан., Копырин Константин Константиновичка приветтэ тиэрдиҥ.

Кинилэргэ дьоллоох үлэ уонна олох иһин эҕэрдэлиибин!!!

Баҕар миэхэ суруйуҥ! Адреһым Полевая почт Станция 1664, 69 стрелковый полк, 2‑я минрота.

Быраһаайдарыҥ!

Суруйдум эһиги оҕоҕут Алексей Громов

6/VI‑42 год».

1943 сыл

«Дьонум Громовтар таптыыр уолгутуттан
Алексейтан приветтэ тутуҥ!

Мин сылдьыым, здоровьям олус үчүгэй. Уруккуттан ула­-
рыйыым суох. Отделенияҕа командирынан сылдьабын. Отделениябар толору байыастардаахпын. Ый ахсын 125 солк хамнаһы ылабын. Дьэ бу ый 27 күнүгэр эһигиттэн 21 ахсынньытыгар 42 сыл суруллубут суругу тутаммын олус үр­дүк үөрүүнү үөрдүм. Онон эһиги здоровайдык, үчүгэйдик олорор сураххытын истэн санаам көтөҕүлүннэ.

Эһиги хаста да суруйбуккут да, миэхэ балтараа сыл туолуор диэри биир да сурук биллибэтэҕэ. Билигин суругу син тутуом диэн эрэнэбин. Только сурук 40‑ча хонугунан кэлэр эбит. Онон аны суруйар суруккут кэлиэр диэри манна олорор биллибэт. Бука, олунньу ыйга наступлениеҕа барыахпыт дии саныыбын. Онно хайтах буолар биллибэт. Балыстарым иккиэн школаҕа куһаҕана суохтук үөрэнэллэрэ олус үөрүүлээх.

Государствоттан сөптөөх көмөнү ылар эбиккит. Бэйэ­ҕит үлэлиир үлэҕитигэр чиэһинэйдик үлэлээн государствоҕа эппиэттээҥ!

Мин дьон народ, общество иннигэр эппинэн-хааммынан үлэлииргэ, охсуһарга быһаарыммытым. Наадалаах кэмҥэ бэйэм олохпун да биэрэри кэрэйбэккэ Кыһыл Армияҕа кэл­битим.

Эһиги биир ынахтаах хаалбыккыт кытаанах. Дьэ сэ­рииттэн мин тыыннаах оттохпуна быстах кыһалҕаттан туо­-
руох­пут. Күүспүтүн түмэн дьоллоохтук олоруохпут. Кытаатан здоровайдык олоруҥ. Үлэҕитин бастыҥнык толоруҥ! Суруйар пока бүтэр. Быраһаайдарыҥ.

Адреһым 1664 полевая почта часть 149 Громову Алексею Романовичу. Адреспар званием киирэрэ наадата суох.

Суруйдум эһиги оҕоҕут Алексей.

22/I-1943 год».

«Таптыыр дьонум Аҕам Роман ийэм Мария
сестраларым Мария уонна Анна буолан
приветтэ тутуҥ!!!

Мин сылдьыым, доруобуйам үчүгэй. Урукку сирбитигэр баарбыт. Сотору иннибит диэки барарга бэлэмнэнэн чугас сиргэ отуунан олоробут. Биһиги Кыһыл Армиябыт Соҕуруу фроҥҥа бөдөҥ кыайыыларын истэ-истэбит сүрэхпит тулуппакка биллиргэччи тэбэр. Өстөөҕү бэрт түргэнник Советскэй сиртэн үүрэн сэриини бүтэрэ охсорго, көҥүл дьоллоох олохпутун салгыырга. Бу дойду айылҕата олус уларыйымтыа. Тыала күүстээх. Адьас кыһын туран бүгүн ардахтыыр. Мин манна саха норуотуттан соҕотохпун. Мин дойдум ыраах, табаарыстарым сурахтарын истибэппин. Дьоммуттан чаастатык сурук тутабын. Элбэхтик толкуйдуубун, олоҕу саныыбын. Ол да буоллар общай интерес иһин бэлэммин. Дьоллоох буоллахпына өстөөҕү үлтүрүтүһэн дойдубар эргийэн тиийиэм.

Дьэ эһиги доруобайдык, үчүгэйдик олорун! Биһиги кыа­йыыбыт туһугар эрэниҥ, бэйэни харыстаммакка үлэлээн!

Мин кыһыл армияҕа службалыыр ааппынан государстыба сөптөөх көмөнү эһиэхэ оҥорор эбит. Мин эһиэхэ службалыыр чааһым биэрбит справкатын ыытабын.

Дьэ колхоһум колхозтаахтарыгар кыайыылаах, дьаныардаах үлэ иһин эҕэрдэлээн туран привет ыытабын!

Суруйар бүтэр. Быраһаайдарыҥ. Аадырыһым 1664 полевая почта часть 149 Громову Алексею Романовичу.

Суруйдум Алексей Громов

16-2-43».

 

Хомойуох иһин, Алексей Громов ыал буолар дьолун билбэтэҕэ, кэнниттэн аатын ааттатар ыччаты хаалларбатаҕа. Ол эрээри кини сырдык аатын суругар мэлдьи таптал сылаас угутунан ахтар балтылара Мария уонна Анна ааттаппыттара, билигин кинилэр оҕолоро, сиэннэрэ, хос сиэннэрэ чиэстээхтик салгыыллар. Норуот өйдүүрүн-саныырын тухары Улуу Буойуттарбыт тыыннаахтар!!!

 

@sakhalitmuseum #проектнеопубликованныерукописи #воиныякутииВОВ #литмузейимойунского #ГромовАлексейРоманович #ТүүлээхУусАлдан #ДеньПобеды75лет

 

Линда Николаевна Иванова,

П.А. Ойуунускай аатынан

Литература музейын

дириэктэрин солбуйааччы,

СӨ култууратын үтүөлээх үлэһитэ