Георгий Саввич Сыромятников (05.05.1926-02.02.1991) литературовед, критик, тылбаасчыт, редактор, филологическай наука кандидата. 1976 с. ССРС Суруйааччыларын союһун чилиэнэ.
Көҥүл өттүнэн 1944 с. Кыһыл Армия сэрии фронугар тылланан барбыта. Кини фроҥҥа байыаннай кистэлэҥ үлэҕэ шифровальщик быһыытынан сылдьыбыт. Сэрии саҕана Советскай правительство Куйбышев (билигин Самара) куоракка көһөн үлэлээбитэ. Куйбышевтааҕы байыаннай уокурукка кистэлэҥ үлэҕэ шифровальщигынан сылдьыбыта. Сэрииттэн 1947 с. эргиллибитэ.

Гаврил Иванович Макаров-Дьуон Дьаҥылы (27.02.1914-06.03.1956) – поэт, тылбаасчыт. 1945 с. ССРС Суруйааччыларын союһун чилиэнэ.
1943 с. күһүнүгэр Дьуон Дьаҥылы хас да саханы кытта сылгылары Иркутскайга тириэрдэр сорудаҕы ылан айаҥҥа турбута. Сылтан ордук кэмҥэ сорудаҕы толорбуттара. Фронт үлэтигэр туһаныллыахтаах 300 тахса сылгы Залари диэн тимир суол станциятыгар тиэрдиллибитэ. Мальта станциятыттан Илиҥҥи кыраныыссаҕа байыаннай чаастарга утаарыллыбыта. Онно 94-с дивизия 152-с стрелковай полкатын 8-с ротатыгар сулууспалаабыта. Бастыҥ пулеметчик этэ. Ыараханнык бааһыран, өр эмтэнэн дойдутугар Чурапчыга 1946 кэлбитэ.

Архип Георгиевич Кудрин-Абаҕыыныскай (20.01.1907-22.09.1960) поэт, тылбаасчыт. 1938 сылтан ССРС Суруйааччыларын союһун чилиэнэ.
1943 с. Кыһыл Армияҕа ынырыллыбыта. Сулууспатын Чита уобалаһын Соловьевскай диэн станцияҕа саҕалаабыта. 1945 с. милитаристскай Японияны утары сэриигэ кыттыыны ылбыта.

Иннокентий Иванович Артамонов (21.11.1928-30.04.2006)
поэт, тылбаасчыт. СР культуратын үтүөлээх үлэһитэ. ССРС бэчээтин туйгуна. 1964 сылтан ССРС Суруйааччыларын союһун чилиэнэ.
1945 с. Япония империалистарын утары сэриигэ рядовой саллаатынан кыттыыны ылбыта. Сэбиэскэй Армия кэккэтиттэн 1951 с. атырдьах ыйыгар дойдутугар эргиллэн кэлбитэ.

Серафим Романович Кулачиков-Эллэй (29.11.1904-14.12.1976) Саха Республикатын норуодунай поэта, тылбаасчыт, публицист. 1938 с. ССРС суруйааччыларын союһун чилиэнэ.
1942 с. бэс ыйыгар Кыһыл Армия кэккэтигэр ыҥырыллыбыта. Старшай сержант. 22-с армия састаабыгар киирэр туспа минометнай полк минометнай отделениятын наводчигынан Калининскай фроҥҥа сэриилэспитэ. Старай Руссаны босхолооһуҥҥа ыараханнык эмсэҕэлээбитэ. Инбэлиит буолан 1944 с. ахсынньыга дойдутугар төннүбүтэ.
1943 с. фроҥҥа сырыттаҕына “Күн сирин көмүскэлигэр” диэн хоһооннорун кинигэтэ бэчээттэммитэ.


Сергей Дмитриевич Шевков (11.01.31-02.04.2005)
поэт, тылбаасчыт. 1973 сылтан ССРС Суруйааччыларын союһун чилиэнэ, Россия суруйааччыта. Россия Улахан литературнай бириэмийэтин лауреата.
Кистэлэҥ буолан 30 сыл устата Корея сэриитигэр кыттыбытын ким да билбэт этэ. Бэтэрээн киниискэтин 1982 с. илиитигэр туттарбыттара. Сэрииттэн Китай норуотун аатыттан бэриллибит икки мэтээллээх төннүбүтэ.