Алексей Спиридонович Бродников (26.02.1917-25.06.1998) – поэт, прозаик, Саха республикатын оскуолаларын үтүөлээх учуутала. 1965 сылтан ССРС Суруйааччыларын союһун чилиэнэ. Россия суруйааччыта.
1942 с. Кыһыл Армия кэккэтигэр ыҥырыллыбыта. Свердлов куоракка байыаннай бэлэмнэниини ааспыта. Снайпер үөрэҕин барбыта. Онно тэриллибит 20-с нүөмэрдээх туспа хайыһар биригээдэтин 188-с стрелковай дивизиятын састаабыгар киирэн Старай Русса, Смоленскай уонна Холм куораттары босхолоспута. Хаста да бааһыран госпиталларга эмтэммитэ. Хорсун сэрииһит “Албан аат “ уордьан 3-с степенинэн, “Аҕа дойду Улуу сэриитэ” уордьан 1-кы степенинэн уонна мэтээллэринэн наҕараадаламмыта. Сэрии кэнниттэн Дириҥнээҕи детдомҥа сэбиэдиссэйинэн үлэлээбитэ, сааһын тухары учууталлаабыта.
Саха литературатыгар тыа сирэ сэрии кэминээҕи олоҕун суруйууну киллэрбитэ. Советскай Союз Геройа Г.Д. Протодьяконов туһунан документальнай сэһэни суруйбута.


Степан Афанасьвеич Саввин-Күн Дьирибинэ (24.12.1903-1970) – поэт, тылбасчыт, сатирик, үгэһит. 1944 с. ССРС Суруйааччыларын союһун чилиэнэ.
1942 с. Кыһыл Армия кэккэтигэр ыҥырыллыбыта. Сталинградскай, Соҕуруу, 4-с Украинскай фроннарга сэриилэспитэ. Гвардия старшината. Танковай – десантнай рота автоматчига. 1942 сыл сэтинньи 21 күнүгэр Сталинград анныгар кыргыһыыга атаҕар ыарахан бааһырыы ылбыта. Хорсун быһыыларын иһин «Албан аат» уордьан 3-с степенинэн наҕараадаламмыта. 1945 с. дойдутугар төннүбүтэ.


Петр Николаевич Тобуруокап (25.10.1917-06.03.2001) – саха республикатын норуодунай поэта. 1957 с. ССРС Суруйааччыларын союһун чилиэнэ.
Кыһыл Армия кэккэтигэр 1942 с. бэс ыйыгар ыҥырыллыбыта. 1943 сылга диэри Сталинградскай фроҥҥа пулеметчигынан сылдьыбыта. Ыарахан бааһырыы кэнниттэн 1943 с. от ыйыгар доруобуйатын туругунан армияттан босхоломмута. “Аҕа дойду Улуу сэриитэ” уордьан 3-с степенинэн, мэтээллэринэн наҕараадаламмыта.


Иннокентий Илларионович Эртюков (24.11.1916-06.06.1991)- поэт, тылбаасчыт, суруналыыс, очеркист, СР культуратын үтүөлээх үлэһитэ. 1950 сылтан ССРС Суруйааччыларын союһун чилиэнэ. Россия суруйааччыта.
1942 с. Кыһыл Армия кэккэтигэр ыҥырыллыбыта уонна сэрии бүтүөр диэри 2-с, 3-с, 4-с Украинскай соҕуруулуу-арҕааҥҥы, Воронежскай уонна Карельскай фроннарга сэриилэспитэ. 216-с гвардейскай пушечнай-артиллерийскай полк састаабыгар киирэн старшай радист-телеграфист быһыытынан кыттан, Украинаны, Карелияны, Румынияны, Болгарияны, Венгрияны, Австрияны босхолоспута. “Кыһыл сулус” уордьаннаах , “Бойобуой үтүөлэрин иһин” мэтээллээх 1946 с. дойдутугар төннүбүтэ.