Төгүрүк остуол б. дь. олунньу 19 күнүгэр П.А. Ойуунускай аатынан литература судаарыстыбаннай түмэлигэр буолан ааста. СӨ инновацияҕа, цифровой сайдыыга уонна инфокоммуникационнай технологияҕа министиэристибэтиттэн, СӨ Үөрэх уонна билим министиэристибэтиттэн, П.А. Ойуунускай аатынан литература судаарыстыбаннай түмэлиттэн, РНА СС Гуманитарнай чинчийии уонна хотугу аҕыйах ахсааннаах омуктар проблемаларын институтуттан, Саха сиринээҕи суруналыыстар сойуустарын бырабылыанньатыттан, СӨ Ил Дарханын Дьаһалтатын уонна СӨ Бырабыыталыстыбатын иһинэн үлэлиир Тыл сайдыытын боппуруостарын сүрүннүүр салалтаттан, ХИФУ Хотугулуу-Илиҥҥи норуоттар тылларын уонна култуураларын институтуттан, бэчээттэн уонна көрдөрөр-иһитиннэрэр эйгэттэн уопсайа 28 киһи кытынна. 7 киһи тыл эттэ, кэпсэтиигэ кытынна.

 

Өрөспүүбүлүкэҕэ тахсар хаһыаттарга, сурунаалларга, саҥа бэчээттэнэр кинигэлэргэ уонна көрдөрөр-иһитиннэрэр эйгэҕэ төрөөбүт тылы туттуу туругун ырытан көрөн баран, Төгүрүк остуол кыттыылаахтара манныгы ылыннылар:

 

  1. Нуучча тылыттан киирэр киэҥник туттуллар билим, тиэхиньикэ, бэлиитикэ тылларын уонна тиэрминнэрин сахатытар үлэни салгыы ыытарга, бэчээт, көрдөрөр-иһитиннэрэр эйгэ көмөтүнэн дьоҥҥо-сэргэҕэ тарҕатарга.
  2. Бэчээккэ, көрдөрөр-иһитиннэрэр эйгэҕэ сахалыы тыыны иҥэрэргэ, ыраастык саҥарыыны сайыннарарга суруналыыстарга (дииктэрдэргэ, биэрии ыытааччыларыгар о.д.а.) сэминээрдэри, кэмпириэнсийэлэри ыытарга.
  3. СӨ инновацияҕа, цифровой сайдыыга уонна инфокоммуникационнай технологияҕа министиэристибэтэ бэчээт, көрдөрөр-иһитиннэрэр эйгэ үлэһиттэриттэн СӨ Бырабыыталыстыбата 2015 с. ахсынньы 22 күнүгэр 501 №-дээх уурааҕынан бигэргэппит «Сахалыы таба суруйуу уонна сурук бэлиэтин быраабылаларын» уонна «Сахалыы таба суруйуу тылдьытын» тутуһалларын ирдииригэр, аан ситимҥэ (интэриниэккэ) сахалыы эйгэни кэҥэтэригэр.
  4. СӨ Ил Дарханын Дьаһалтатын уонна СӨ Бырабыыталыстыбатын иһинэн үлэлиир Тыл сайдыытын боппуруостарын сүрүннүүр салалтатыгар СӨ Төрүт Сокуонугар мэктиэлэнэр икки судаарыстыбаннай тыл – нуучча уонна саха тыла – судаарыстыбаннай да, чааһынай да бэчээт эйгэтигэр сахалыы таба суруйуу нуормаларын тутуһууну хонтуруоллууругар, тиэрмин хамыыһыйатын үлэтин сөргүтэригэр.
  5. ХИФУ Арассыыйа Хотугулуу-Илиҥҥи норуоттарын тылларын уонна култуураларын института «Сахалыы таба саҥарыы (орфоэпия) тылдьытын» оҥороругар.
  6. РНА СС Гуманитарнай чинчийии уонна хотугу аҕыйах ахсааннаах омуктар проблемаларын институтугар саха тыла араас идэ эйгэтигэр киэҥник туттулларын хааччыйар тиэрмин тылдьыттарын оҥороругар.
  7. СӨ Үөрэх уонна билим министиэристибэтэ үөрэх кинигэлэрин сахалыы тылбааһын чочуйарыгар.