П.А. Ойуунускай аатынан литература түмэлигэр «Ытык Ильмень: ууну кытта уу буолбуттар» диэн Ильмень күөлгэ хабыр хапсыһыы буолбута 77 сылыгар аналлаах кэриэстэбил киэһэтэ буолла. Тэрээһин И.Винокуров-Чаҕылҕан тылларыгар, А.Костин мелодиятыгар норуокка киэҥник биллэр “Хайыһар” ырыаны толорууга «Саха» НКИК өрөспүүбүлүкэтээҕи флешмоб-аахсыйатыгар кыттыыттан саҕаланна.

Сергей Васильев «Ытык Ильмень» баллаадатын Уус Алдан улууһун Суотту орто оскуолатын үөрэнээччилэрэ, өрөспүүбүлүкэтээҕи оскуолалар 84 сыллааҕы выпусниктара уонна  түмэл дириэктэри солбуйааччыта Линда Иванова уонна сэбиэдиссэй Ньургуйаана Халгаева аахтылар. ХИФУ бэрэпиэссэрэ, филологическай наука дуоктара Зоя Башарина «Значение поэмы Сергея Васильева Священная Ильмень (Ытык Ильмень) в патритиотическом воспитании народов Якутии» поэма туһунан сүрүн дакылааты иһитиннэрдэ. Саха Өрөспүүбүлүкэтин биллэр режиссера, «Журавли над Ильменем» киинэни оҥорорго көмөлөспүт, А.Е. Кулаковскай аатынан судаарыстыбаннай бириэмийэ лауреата, СӨ култуура туйгуна Эдуард Новиков бу киинэҕэ хайдах үлэлэспитин кэпсээтэ.

Тыыннаах эргилллибит суруналыыс-буойун Канаев Иннокентий Петрович туһунан Варвара Николаевна Угарова, оттон саха живописеһа Александров Семен Лаврентьевич туһунан Ефросиния Семеновна  Ноговицына кэпсээтилэр.

Пластинкаҕа поэт Сергей Васильев «Ытык Ильмень” баллаадын бэйэтэ аахпытын дьон-сэргэ сэргии иһиттилэр. СӨ үтүөлээх энергетигэ, Ньурба улууһун Түмүк нэһилиэгин бочуоттаах олохтооҕо, Ильмень күөлгэ буолбут кыргыһыы туһунан үөрэтиинэн дьарыктанар Ксенофонт Васильевич Васильев олус интэриэһинэйдик кэпсээтэ.

СӨ үтүөлээх учуутала Альбина Семеновна Колодезникова бу күннэргэ Улуу Ильмень күөлгэ кыргыһыы 77 сылыгар уонна  СӨ норуодунай суруйааччыта Егор Неймохов кэриэһигэр «Великий Новгород — Старая Русса» трассаҕа мемориальнай дуоска турбутун туһунан иһитиннэрдэ. Уус Алдан улууһун Суотту орто оскуолатын саха тылын, литературатын үрдүк категориялаах учуутала, «Сыл бастыҥ учуутала-2009» сыллааҕы РФ Бэрэсидьиэнин Гранын хаһаайката, СӨ Үөрэҕириитин туйгуна Ядрихинская Ирина Романовна оҕолору хоһоону ааҕыыга олус үчүгэйдик бэлэмнээн аҕалбыт уонна дириҥ ис хоһоонноох тылы эттэ. Сергей Васильев сиэнэ Айысхаана Васильева эһэтигэр анаабыт хоһоонун дорҕоонноохтук аахта.

Хаартыскаҕа: муосчут Аким Бурцев, ССКП Саха сирин уобаластааҕы кэмитиэтин бастакы сэкириитэрэ Г.И. Чиряев, Уус Алдан райкомун сэкиритээрэ П.В. Данилов, Горнай улууһуттан Ильмень Күөлгэ кыргыһыы кыттааччыта Петр Федоров Новгород түмэлигэр сэлии муоһун бэлэх туттарыы түгэниттэн.