Саха талааннаах суруйааччыта, саха литературатыгар “Маарыкчаан ыччаттара” бастакы романы суруйбут Семен Степанович Яковлев-Эрилик Эристиин төрөөбүт дойдутугар Чакыр нэһилиэгэр тохсунньу 24 күнүгэр музей үлэһиттэрэ уонна суруйааччылар Сэмэн Тумат, Урсун, Харысхал, Гаврил Андросов буолан баран кэллибит.

Манна Эрилик Эристииин аатынан оскуолаҕа оҕолордуун көрсүһүүгэ, ф.н.к. Филиппова Мария Егоровна хомуйан оҥорбут суруйааччы  Эрилик Эристиин “Айыы Дьөһүөл” кинигэтин биһирэмигэр уонна Аҕа дойду сэриитин кыттыылааҕа, “Суумкатын сүгэн” ырыа ааптара Гаврил Дмитриевич Ефимов төрүттээбит литературнай-мемориальнай музейыгар сырыттыбыт. Бу музей 1976 сыллаахтан үлэтин саҕалаабыт. Манна суруйааччы тус малларыттан суруксуттаабыт остуола, олоппоһо, ачыкыта, бартыбыала, рукописьтара, оччотооҕу кинигэлэр, хаһыаттар хараллан сыталлар. Бу хас биирдиилэрэ дьикти сэһэннээх сэдэх экспонаттар буолаллар. Оччотооҕуга бу музейы өр кэмҥэ көрөн-истэн Николай Васильевич Филиппов директорынан олорон  почтанан Сэбиэскэй Сойуус араас дойдуларыгар сурук суруйталаан ыыппыт, онуоха дойду араас сириттэн автогравтаах кинигэлэри ыыталаан музей фондата хаҥаан күн бүгүн сэдэх бибилотека буолбут. Онон олус баай историялаах, экспонаттардаах Эрилик Эристиин аатынан мемориальнай музей инникитин бу интернет үйэтигэр аата аар-саарга ааттаныа, кэҥиэ-сайдыа диэн эрэнэбит.

Бу айан-сырыы олус сэргэх кэпсэтиилээх буолла. Аны икки сылынан Э.Эристиин төрөөбүтэ 130 сыла. Урукку үтүө үгэһинэн,  Эрилик Эристиин аатынан совхоз Саха сирин суруйааччыларын кытта доҕордуу сибээһин  сөргүтэн икки өттүттэн үлэ барарыгар бэйэлэрин баҕа санааларын эттилэр.

Халгаева Нюргуяна Викторовна, 29.01.20