Э.К. Пекарскай аатынан Игидэй орто оскуолатын үөрэнээччилэрэ – П.А. Ойуунускай аатынан литература музейын эдэр доҕотторо. Бүгүн кинилэр бэрт сэргэх сонуннарын үллэстибиттэрин таһаарабыт. Оҕо саастарыттан сахалыы саҥа сайдарын туһугар сүрэхтэринэн-дууһаларынан кыһаллар үөрэнээччилэр баалларыттан киэн туттабыт. Саҕалаабыт дьыалаҕыт үтүө түмүктэрдээх буоллун диэн алгыыбыт.
Э.К.Пекарскай аатынан Игидэй орто оскуолатыгар бүгүн «ИТ- мин идэм» диэн өрөспүүбүлүкэ үрдүнэн ыытыллар тэрээһин бэрт сэргэхтик ыытылла турар. VIII төгүлүн Таатта улууһугар саҕаланна. Улуус үрдүнэн уопсайа 5 оскуолаттан 11 хамаанда күрэхтэһэ кэллэ. Ол курдук, олохтоох Игидэй орто оскуолатыттан 3 хамаанда күрэхтэһэ сылдьар.
Игидэй оскуолатын бастакы хамаандатыгар Захарова Алина, Бурмистрова Галя, Аргунова Айта-менеджер бааллар.
Саха тыла кэнники кэмҥэ сүтүөн сөп диэн сытыы мөккүөр күн бүгүн биһиги олохпутугар сытыытык турар. Ол иһин бу теманы таллыбыт. Оҕо интэриэһин кыра сааһыттан тардар инниттэн сахалыы оонньуулары оҥордубут.
Бу оонньуубут кыра саастаах оҕолорго ананар. Телефонтан приложениелары хачайдаан, сахалыы тылынан оҕо интэриэһин тардар инниттэн, саҥа технологияҕа сөп түбэһиннэрэн оонньуу толкуйдаатыбыт.
Бырайыакпытын менеджер Аргунова Айта дьүүллүүр сүбэ иннигэр көмүскээтэ.
Луковцева Венера, 9 кылаас үөрэнээччитэ
Салайааччы: Ефимова В.К., саха тылын уонна литературатын учуутала
