Саха Республикатын народнай поэта Петр Николаевич Тобуруокап 1917 с. алтынньы 25 күнүгэр Үөһээ Бүлүү улууһугар төрөөбүтэ.

Н.Г. Чернышевскай аатынан Бүлүүтээҕи педучилищены, Үрдүкү литературнай куурустары бүтэрбитэ. Өр сылларга оскуолаларга, А.М. Горькай аатынан литературнай институкка учууталынан үлэлээбитэ. Аҕа дойдуну көмүскүүр Улуу сэрии кыттыылааҕа.

Маҥнайгы кинигэтэ «Буквалар мунньахтара» 1948 с. тахсыбыта. Онтон бэттэх хас эмэ уонунан ахсааннаах хоһоонунан, кэпсээнинэн кинигэлэрэ бэчээттэммиттэ. Норуокка киэҥник тарҕаммыт элбэх ырыа тылларын суруйбута. Ыччат, оҕо аймах тапталлаах суруйааччыта этэ. Сатира жанрыгар эмиэ ситиһиилэрдээҕэ. Кэлин сылларга драматургияҕа, прозаҕа эмиэ үлэлээбитэ.

«Бочуот Знага» уордьанынан, элбэх мэтээлинэн наҕараадаламмыта. Саха Республикатын культуратын үтүөлээх үлэһитэ. 1957 с. ССРС Суруйааччыларын союһун чилиэнэ. 1991 с. Саха Республикатын Суруйааччыларын союһун чилиэнэ. 2001 с. кулун тутар 6 күнүгэр өлбүтэ. Үөһээ Бүлүүгэ көмүллүбүтэ.