Саха Республикатын народнай поэта.

Савва Иванович Тарасов 1934 с. муус устар 25 күнүгэр Горнай улууһугар төрөөбүтэ. 1953 с. Бэрдьигэстээх орто оскуолатын бүтэрэн, оройуоннааҕы хаһыакка литературнай үлэһитинэн киирбитэ.

Республикатааҕы ыччат «Эдэр коммунист» хаһыатыгар редакторынан өр сылларга үлэлээбитэ. Онтон «Хотугу сулус» сурунаал кылаабынай редакторын солбуйааччытынан, «Кыым» хаһыат культураҕа отделын сэбиэдиссэйинэн анаммыта. Хаһыаттарга үлэлиир сылларыгар ЫБСЛКС КК иһинээҕи Киин комсомольскай оскуоланы, А.М. Горькай аатынан Литературнай институт иһинэн Үрдүкү литературнай куурсу үөрэнэн бүтэртээбитэ.

1983 с. алтынньыга Саха сирин суруйааччыларын Х съеһигэр С.И. Тарасов бырабылыанньа бэрэссэдээтэлин солбуйааччытынан, онтон 1993 с. сэтинньигэ бырабылыанньа бэрэссэдээтэлинэн быыбардаммыта.

С.И. Тарасов хоһоонноро республика бэчээтигэр 1950 с. тахсан барбыттара. 20-чэ хоһоон, поэма кинигэлэрдээх. Кини хоһоонноругар саха композитордара, мелодистара ыччат таптаан ыллыыр элбэх ырыаларын айдылар.

С.И. Тарасов тылбаасчыт быһыытынан ааҕааччыларга эмиэ киэҥник биллэр: Е. Исаев «Өй-санаа дьүүлэ»,

С. Островой «Ийэ» диэн поэмаларын тылбаастаабыта, Шекспир «Гамлет», «Макбет», «Лир хоруол», Эврипид «Медея» диэн трагедияларын сахалыы саҥардан, П.А. Ойуунускай аатынан драматическай театр сценаларыгар ситиһиилээхтик туруортарбыта.

С.И. Тарасов 1964 с. ССРС Суруйааччыларын союһун чилиэнэ, Российскай Федерация уонна Саха Республикатын культураларын үтүөлээх үлэһитэ, П.А. Ойуунскай аатынан государственнай, Россия «Улахан литературнай», Саха комсомолун уонна Ем. Ярославскай аатынан журналистскай бириэмийэлэр лауреаттара. Россия Суруйааччыларын союһун бырабылыанньатын Кырдьаҕастарга сэбиэтин чилиэнэ. СР Гимнин ааптардарыттан биирдэстэрэ.