Саха Республикатын народнай поэта.

Леонид Андреевич Попов 1919 с. атырдьах ыйын 14 күнүгэр Сунтаар улууһугар төрөөбүтэ. 1937 с. бэчээттэнэр. Хоһооннорун бастакы кинигэтэ «Күүтэбин көрсүһэр күннэри» 1943 с. тахсыбыта.

Л. Попов саха поэзиятын Аан дойду, Сэбиэскэй Союз киэҥ ааҕааччытыгар таһаарсыбыт үтүөлээх. Ырыа тылларын суруйар поэт. Таптал лиирикэтигэр уонна гражданскай лиирикэҕэ күүстээх.

Проза жанрыгар эмиэ ситиһиилэрдээх. «Күн таастаах хайабар» (1961 с.) кэпсээн, «Күндэли» (1970 с.) сэһэн, «Тоҕой Сэлэ» (1976 с.) уонна «Мэйи сирэ» (1978 с.) роман кинигэлэрдээх. «Охоноос уолаттара» (1968 с.) пьесалар кинигэлэрин ааптара. Суруйааччы уус-уран тылбааска дьаныардаахтык үлэлээбитэ. Н. Гоголь «Тарас Бульбатын», А. Фадеев «Эдэр гвардиятын», Б. Полевой «Дьиҥнээх киһи туһунан сэһэнин», А. Пушкин, М. Лермонтов, В. Маяковскай уо.д.а. айымньыларын тылбаастаабыта. Л. Попов РСФСР Суруйааччыларын союһун бырабылыанньатын чилиэнэ этэ. Үлэ Кыһыл Знамята уонна «Бочуот Знага» уордьаннарынан, мэтээллэринэн наҕараадаламмыта.

1944 с. ССРС Суруйааччыларын союһун чилиэнэ. 1990 с. муус устар 1 күнүгэр ыалдьан өлбүтэ. Дьокуускайга көмүллүбүтэ.