Саха Республикатын народнай суруйааччыта.

Николай Алексеевич Лугинов 1948 с. атырдьах ыйын 14 күнүгэр Кэбээйи улууһугар төрөөбүтэ.

1972 с. СГУ физико-математическай факультетын бүтэрэн, Хаҥалас улууһугар, Хатаска орто оскуола учууталынан, ЫБСЛКС обкомугар инструкторынан, Нам улууһугар типография директорынан үлэлээбитэ. Москваҕа Үрдүкү литературнай куурустары бүтэрбитэ. Билигин П.А. Ойуунускай аатынан Литературнай музей директорынан, СР духовноска академиятын вице-президенинэн, СР Президенин сэбиэтин чилиэнинэн, Россия Суруйааччыларын союһун бьырабылыанньатын хос бэрэссэдээтэлэнинэн улэлиир.

1974 с. бэчээттэнэр. Бастакы кинигэтэ «Кэпсээннэр» 1976 с. тахсыбыта. Элбэх сэһэн, роман кинигэлэрин ааптара. Театрга ситиһиилээхтик туруоруллубут пьесалардаах. Кини кинигэлэрэ нууччалыы, сорох Европа тылларыгар тылбаастаммыттара. Аан дойдутааҕы «Алжир – культуралар быһа охсуһууларыгар», Казахстан «Алаш», Россия «Улахан литературнай» бириэмийэлэрин лауреата, СР искусствотын үтүөлээх деятелэ.

Кини прозатын улахан ситиһиитинэн «Таас Тумус» сэһэннэрэ уонна үс кинигэлээх «Чыҥыс Хаан ыйааҕынан» романа буолар. Бу романынан «Чингисхан кистэлэҥэ» уус-уран киинэ уһулунна. Суруйааччы быһыытынан айымньылара философскай хабааннаахтар, ураты сахалыы колориттаахтар.

Суруйааччы союһугар ылар коллегия бэрэссэдээтэлин быһыытынан элбэх литературнай ыччаты үүннэрдэ. Россияҕа тылын-өһүн ылыннарар биир дьоһуннаах киһибит. Кини кэлин сылларга олус наадалаах классиктары нууччалыы тылбаастааһын боппуруостарын туруорсар.

Н. Лугинов 1979 с. ССРС Суруйааччыларын союһун чилиэнэ. Аан дойдутааҕы Тюркскай академия дьиҥнээх чилиэнэ.

Норуоттар доҕордоһууларыгар, литература сайдыытыгар үтүөлэрин иһин Монголия «Найрамдал» уордьанынан, «Россиялыын бииргэ – 370», «Гражданскай килбиэн» знактарынан наҕараадаламмыта.