Саха Республикатын народнай суруйааччыта

Андрей Васильевич Кривошапкин

1941 с. алтынньы 17 күнүгэр Эбээн-Бытантай улууһугар төрөөбүтэ.

Ленинградка А.И. Герцен аатынан пединституту бүтэрбитэ. Үлэтин 1970 с. учууталынан, оскуола директорынан, «Кировскай» совхоз управляющайынан саҕалаабыта. Республика биллиилээх общественнай, государственнэй деятелэ, народнай депутата, эбээн бастаан-көстөөн иһэр суруйааччыта.

Кини 1962 с. бэчээттэнэр. Бастакы эбээн оҕолоругар аналлаах «Опо» диэн кинигэтэ 1969 с. тахсыбыта. Онтон бэттэх араас жанрга (кэпсээн, хоһоон, публицистика) 30-тан тахса кинигэтэ бэчээттэннэ. Талаана ордук проза жанрыгар тобулунна. Ол курдук кини кыра кэпсээннэртэн саҕалаан, ааҕыллымтыа сэһэннэри, романнары суруйда. Төрөөбүт тылынан тахсыбытын таһынан, кини сүрүн айымньылара саха уонна нуучча суруйааччыларын тылбааһынан сахалыы, нууччалыы бэчээттэннилэр.

А.В. Кривошапкин Эрилик Эристиин аатынан Литературнай бириэмийэ лауреата, СР культуратын үтүөлээх үлэһитэ, Россия «Улахан литературнай» бириэмийэтин лауреата.

1982 с. ССРС Суруйааччыларын союһун чилиэнэ. Социологическай наука кандидата.